“Ministériu Saúde ho kolaborasaun ho USAID nia atividade ba sustentabilidade sistema Saúde hakarak konvida Exmo/a. Diretdor/a hodi bele marka prezensa iha Workshop diskusaun prelimináriu ba polítika avaliasaun dezempeñu ba pesoál saúde, manuál deskrisaun servisu no manuál rekrutamentu ba Ministériu Saúde”, dehan Ministra Saúde, Odete Maria Freitas Belo, iha Ótel Timor, kinta (09/06).
Haree ba workshop ne’ebé halo objetivu diskusaun prelimináiu ida ne'e hodi halibur diretór no xefe departamentu sira iha Ministériu Saúde atubele halo aprezentasaun no hala'o diskusaun kona-ba polítika avalissaun dezempeñu ba pesoál saúde.
“Diskusaun iha workshop ne'e sei lidera husi ekipa tékniku sira husi Ministériu Saúde no sei apoia mós husi ekipa USAID nia atividade”, dehan nia.
Diretór sira no Xefe Departamentu sira husi Nasionál, servisu saúde munisípiu no diretór ezekutivu husi ospitál rejionál no ospitál nasionál sei kontribui sira-nia hanoin, sujestaun no idea sira.
“Partisipante sira mós sei diskute klean kona-ba kritéria ba evaluasaun dezenpeñu no deskrisaun servisu sira ba kuadru sira ne'ebé diferente, hanesan: médiku jerál no espsialista sira, enfermeiru sira, parteira sira no tékniku aliadu sira”, esplika nia.
Diskusaun no aprezentasaun idea no rekomendasaun sira sei tuir kedas ho sessaun ida kona-ba dezenvolve planu ida hodi implementa rekomendasaun sira, ne'ebé foku ba identifikasaun etapa no rekursu sira ne'ebé presiza.
Iha workshop ne'e atu hetan input husi partisipante sira kona-ba esbosu dokumentu polítika ho manuál ne'ebé planu atu dezenvolve daudaun.
Tanba idea no sujestaun sira sei informa elementu fundamentál sira husi jestaun ba forsa-servisu saúde liuhusi hadi’ak polítika no prátika rekrutamentu sira, kolokasaun, retensaun ba funsionáriu iha área rurál no evalusaun dezenpeñu ba profesionál saúde sira ne'ebé iha rezime karreira espesiál nia okos.
Ho esforsu ida ne'e aliña ho Timor-Leste ninia planu estratéjiku nasionál rekursu umanu ba saúde (2020-2024), workshop ne'e sei hala'o durante loron rua hahú ohin to'o aban.
Ministériu Saúde lori Governu hato'o obrigadu ba Governu Amérikanu iha Timor-Leste ba nia programa USAID sustentabilidade ba sistema saúde. (*)