Akontesementu ne'e, iha loron 01 fulan-juñu tinan-2022, pur-volta tuku 07:30 parte kalan, iha área Telekom Vila Nova, Postu Administrativu Baukau Vila, Munísipiu Baukau.
Matebian Domingos Ximenes (63) ho suspeitu moras metal naran Paulino Ximenes Perreira (45) relasaun família hanesan fetosan umane.
Suspeitu moras mental ne'e, baku matebian ho besikanu to'o rejulta matebian hetan kanek grave iha parte ulun karuk, hasan karuk tohar, tilun parte loos nakles, inklui liman karuk tohar.
Hafoin akontese, komunidade sira liga ba parte PNTL to'o iha fatin akontesementu hodi transporta tiha vítima ba Óspital Rejionál Eduardo Ximenes (HoREX-sigla portugés) Baukau halo tratamentu.
Maibé, iha loron 02 fulan-juñu tinan-2022 parte dader, tenke transporta matebian ba HNGV, tanba razaun rádiolojia iha HoREX avaria.
Hafoin halo tratamentu durante loron-4 iha HNGV, iha loron 06 fulan-juñu tinan-2022 parte loraik, matebian hakotu iis.
"Iha momentu ne'eba, ha'u la espera nia oho ha'u nia Pai ho besikanu no ikus ha'u nia Pai hakotu nia iis iha dia 06 de junho de 2022 iha Óspital Guido Valadares," dehan Oan husi Matebian, Anina Ximenes Guterres, iha rezidensia vila nova Baukau, kuarta (08/06).
Durante matebian halo tratamentu iha HNGV, médiku sira atende masimu, maibé lakonsege salva nia vida.
"Sira atende duni, Óspital hato'o mai ami katak, ó nia Pai ne'e só hein de'it Maromak, sé karik nia bele salva, entaun o nia Pai sei moris, tanba ó nia Pai nia otak kecil ne'e rán tama tiha ona ba laran, atu operasi labele, tanba rán kafuak boot mak iha laran, operasi mós nia tenke mate, la operasi mós nia tenke hakotu nia vida," nia haktuir
Akontese ne'e, parte família husi matebian lakondena suspeitu, tanba haree kondisaun moras mental inklui mós iha relasaun família hanesan fetosan umane.
Tanba ne'e, husu parte relevante atu evakua tiha suspeitu moras mental Paulino Ximenes Perreira ba fatin moras mental nian iha Lakulubar, Munísipiu Manatutu, nune'e bele hetan tratamentu ba futuru labele akontese tán situasaun hanesan.
Xefe Aldeia Samalakuliba, Americo Marquez, haktuir, durente ne'e, ema moras mental, Paulino Ximenes Perreira idade hanesan ho matebian Domingos Ximenes, maibé derepente oho matebian.
"Ha'u rekomenda ba estadu atu evakua tiha ema difisiensia moras mental ba fatin tratamentu nian, depois di'ak tiha mak justisa kazu ne’e tuir lei ne'ebé vigor iha Timor-Leste," nia rekomenda
Wainhira la evakua moras mental ba nia fatin, posibilidade bele akontese tán situasaun hanesan iha futuru.
Hafoin akontese iha loron 01 fulan-juñu tinan-2022 parte kalan, Komandu Polísia Nasionál Timor-Leste (PNTL) Munísipiu Baukau, liuhusi eskuadra PNTL Postu Baukau Vila, asegura kedas suspeita ho moras mental ne'e, iha eskuadra PNTL Postu Baukau Vila nian.
"Suspeitu iha hela ne'eba sira (membru PNTL) lori mai iha eskuadra, mais ami latau iha sela, tanba ema ne'e kondisaun saúde la normal, tanba ita husu ba ko'alia la sambung," dehan Komadante PNTL eskuadra Postu Baukau Vila, inspektur Marcelino Fraga. (*)