Tuir informasaun ne’ebé www.tempotimor.com asesu iha pájina Palásiu Sizas, sesta (03/06) katak, Ministériu Saúde liuhusi Servisu Saúde Munisípiu Dili ho parseiru Cruz Vermelha Timor-Leste (CVTL) kontinua halo intervensaun kontrolu vetor kauzante moras Dengue hodi trava nia transmisaun.
Maske Timor-Leste oras ne'e dadaun atu hakat ba tempu husi udan ba bailoron, maibé Ministériu Saúde husu nafatin komunidade atu kontinua prátika medida preventiva sira hanesan, fase tanki haris fatin no troka bee semana ida dala ida, fakar no troka bee iha vazu ai-funan, fakar bee nalihun iha roda, balde no lata aat sira ou hakoi karik la uza ona, toba iha muskiteiro iha oras dadeer too loraik. Uza ropa ne'ebé bele taka liman no ain iha oras loron, kose autan, minyak telon kada oras 4 husi tuku 06.00 dader too tuku 06.00 kalan no ba fasilidade saúde karik labarik sira isin manas loron 2 ka liu ona, akompaña ho lakohi han, kabun laran moras, muta (dala ruma ho rán). (*)