Tuir informasaun ne’ebé www.tempotimor.com asesu iha pájina Palásiu Sinzas, tersa (31/05) katak, husi totál 24 funsionáriu foun ne’ebé simu pose kompostu husi médiku jerál Junior ema na'in-16, médiku dentista junior na’in-8 ne’ebé sei hala’o kna’ar iha ospitál sira iha teritóriu laran.
Profisionál saúde foun hirak ne'e sei prienxe ba fasilidade saúde hirak ne'ebé sira konkorre, maiória mak konkorre ba iha postu saúde sira ne’ebé presiza rekursu.
“Dala ida tan ita sai testemunña ba kompromisu boot husi VIII Governu Konstitusionál atu haforsa Funsaun Públika ne’ebé bele serve di’ak liu Estadu no povu rai doben ida-ne’e liliu iha setór saúde”, deklara Ministra Saúde, iha Palásiu Sinzas, Kaikoli, segunda (30/05).
Maibé Ministeriu Saúde kontinua hala’o esforsu boot hodi re-organiza, renova no inova servisu nasionál saúde ho objetivu atu hadi’a di’ak liután prestasaun kuidadu saúde primária no ospitalár ho kualidade ba populasaun.
Aleinde ne'e buka maneira tékniku, materiál no finanseiru hodi hadi’a asesu asisténsia saúde iha komunidade liliu ba maluk sira-ne’ebé hela iha área remotas.
“Mensajen inporante ne’ebé hakarak atu trasmite ba ita hotu, agora ita sai nu’udar servidór ba ita-nia nasaun hanesan médiku jerál no médiku dentista hodi utiliza ita-nia matenek no sentidu dedikasaun hodi promove prinsipiu no valór deontolojiku no konduta profisionál hodi kontribui ba esforsu tomak ne’ebé Ministeriu Saúde halo hodi promove konfiansa husi utentes no família tomak iha ita-nia servisu nasionál saúde nian”, afirma nia.
Ba médiku foun sira Ministra Odete dehan, hanesan joven profisionál saúde kareira hahú iha momentu ne’ebé mak bele dehan di’ak, nune’e profisionál saúde benefisia rejime kareira espesiál, siknifika katak área servisu hanesan funsionáriu públiku rejime karreira espesiál.
Tanba ne’e konsentra tempu no ka’er metin ba interrese nasaun nian no korajen atubele enfrenta dezafiu no obstaklu, profisaun rasik, liuhusi komunikasaun atubele fó asisténsia ida-ne’ebé di’ak ba komunidade.
Iha oportunidade ne'e, Ministra Saúde mós agradese ba Prezidente Komisaun Funsaun Públika ne’ebé prontu nafatin atu suporta ministériu saúde iha misaun importante ida-ne'e. (*)
