‘Kuandu komunidade husi suku Fatumakerek mak hetan moras sira hulan de'it la'o oras ualu (8) hodi mai sentru saúde Laklubar tanba pior liu mak akontese dia 04 Abríl ne'e estraga totál estrada sira, transporte todan rua no roda haat de'it mós asesu labele la'o de'it kuaze oras ualu”, dehan Xefe Sentru Saúde Laklubar, Inacio de Armando ba www.tempotimor.com iha nia kna’ar fatin Laklubar, kinta (12/05).
Suku Fatumakerek, Postu Administrativu Laklubar, Munisípiu Manatuto, área ida ne'ebé izoladu tebes iha área fronteira entre Manatuto no Manufahi tanba ne'e difikulta tebes komunidade sira asesu ba klínika sira iha Manatutu laran tomak.
Tanba ne’e husu ba Ministériu Saúde atu koloka Enfermeira no Doutór ida hodi fasilita komunidade sira hodi labele hulan pasiénte sira to'o ba Laklubar ho tempu oras ualu.
“Fatumakerek enfermeira no médiku laiha hotu, tanba ne'e mak ami sujere ba parte kompetente atubele haree mós iha ita-nia médiku no infermeiru mós bele destaka iha area refere tanba dook husi Laklubar e fronteira ho Same tanba ne'e difísil tebes bainhira sira hetan moras ruma”, haktuir nia.
Ho inundasaun boot ne'ebé akontese iha loron 04 fulan-abríl tinan 2021 liu difikulta transporte tama ba suku refere no pesoál saúde sira la'o vizita mós labele ho distánsia dook liu, tanba la'o ain kuaze oras ualu (8).
Mezmu iha Suku Fatumakerek iha ona postu Saúde ne'ebé konstrui iha tinan 2021, maibé seidauk entrega ba Ministériu Saúde tanba ne'e to'o agora seidauk koloka Enfermeira no médiku iha postu saúde refere. (*)
