Xefe departementu unidade armazenamentu rejionál SAMES Baukau, João Cancio Ornai Ximenes, hatete, bazeia ba relatóriu iha fulan abríl tinan-2022, ai-moruk ho item 270 hodi disponível iha SAMES rejionál Baukau, stock out hamutuk 221 mak laiha, maibé liuhusi pedidu, dadaun hetan ona apoiu husi nasionál.
"Foin dadauk sesta feira semana kotuk ne'e, aimoruk ne'ebé ita husu halo rekizasaun pedidu regular ba SAMES sentral, ékipa responde ona pedidu tama iha sesta feira karreta (truk) box rua," nia dehan iha kna'ar fatin, tersa (10/05).
Nune’e, dadaun ékipa SAMES rejionál Baukau halo ona prosesu verifikasaun hafoin update iha sistema.
Pedidu ne'ebé SAMES rejionál Baukau hato'o ba nasionál ne’e, atu apoiu aimoruk medisina, konsuvez, aekonsumavez, dental item, oxigénio item, ba aimoruk general inklui oxigénio.
"Ida ne'e mak agora dadaun ita rai iha ita nia fatin, ne'ebé nia sei fahe fali tán ba aimoruk vitál esensial no nesesaria," nia hatete
Antes ne’e, iha loron 21 fulan-abríl tinan 2022, Xefe unidade farmasia Óspital Rejionál Eduardu Ximenes (HoREX-sigla portugues) Baukau, Edegar Fiderio da Silva, informa, ai-moruk iha Óspital Rejionál Eduardo Ximenes, durante semana ida resin ai-moruk iha farmasia menus, nune'e hato'o pedidu ba SAMES rejionál no nasionál liuhusi sistema dijitál, maibé hatan aimoruk laiha.
Aimoruk ne'ebé laiha mak, dioritik nian, antibiotik tablet, aimoruk konsumavel urinbek no vítamina ba inan isin rua. (*)