“Sistema ida ne'e bele ajuda tebes Governu liuhusi Ministeriu saúde hodi halo kooperasaun, koordenasaun nomós interesante liu oinsá sira bele advokasia Sensivilizasaun kona-ba saúde nune'e bele aumenta koñesimentu komunidade nian ba saúde di'ak liután”, dehan Bonifacio hafoin lansamentu REBAS iha Timor Plaza, Suai Room, kinta (05/05).
Tanba programa ne'e tuir duni planu estratejiku dezenvolvimentu nasionál saúde 2011 to'o 2030 nian hodi bele hasa’e prestasaun saúde iha área remotas sira.
“Iha 2030 ne'e ita hakarak objetivu ita-nia povu tenke saudavel, entaun ita hasae liuba prestasaun saúde kuidadus primariu liliu fó atensaun liuba área remota, ita-nia objetivu atu atende ema hothotu hanesan no kualidade hanesan”, dehan nia.
Nune’e Ministériu Saúde sei hadi'a kapasidade pesoál saúde nian, atubele iha prestasaun di'ak hodi atende saúde komunidade sira iha futuru ho di'ak liután.
Diretora Ezekutivu FONGTIL, Eleizabeth Lino Araújo hatete, FONGTIL sai parseru kritika ba Governu liliu ba Ministériu Saúde atu halo liña koordenasaun ho REBAS.
“Governu Timor-Leste liuliu Ministériu Saúde tenke halo liña kordenasaun ho Rede ba Saúde iha Timor-Leste, ami bele propoin informasaun ne'ebé ami hetan iha tereñu ba sira”, dehan nia.
Tanba REBAS ne'e rasik iha FONGTIL nia okos sira mak bele halo rede advokasia ba setór saúde.
"Ita-Boot sira hatene buat barak mak Ministériu Saúde halo ona, maibé ho REBAS nia ezistensia atu halo di'ak liután, atendementu públiku ne'ebé iha, sistema saúde ita-nia seidauk adekuadu loos, tanba ami ba komunidade sira-nia leet sira hakerek loos ba saúde”, esplika nia. (*)