Lansamentu ne’e hetan partisipasaun direta husi Diretór Ezekutivu FONGTIL ho parseru Enkaregadu Negósiu Embaixada Estadus Unidus Amerika iha USAID Timor-Leste, no Vise Ministru Saúde, hamutuk ho reprezentante ONG lokál no internasionál sira.
“REBAS-TL ne'ebé estabelese ho apoiu husi Governu Amerika ne'e, halibur ONG 44 ne'ebé foka ba setór saúde atubele fahe informasaun no ideia hodi bele hato'o ba komunidade sira-nia preokupasaun kona-ba servisu saúde no ben-estar”, dehan Diretór Ezekutivu FONTIL, Elizabeth Lino Araujo, hafoin lansamentu REBAS, iha Timor Plaza, Suai Room, kinta (05/05).
Rede foun ne'e estabelese atu eleva sosiedade sivíl sira-nia envolvimentu ho Governu hodi asegura servisu saúde ne'ebé inkluzivu, justu, no kualidade ba Timoroan.
Enkaregadu Negósiu Embaixada Estadus Unidus Amerika USAID Timor-Leste, Tom Daley hatete, lansa programa ne'e iha Timor-Leste atu garante ema hothotu bele asesu kualidade saúde di'ak no efetivu.
“Ha'u hakarak fó parabéns ba membru REBAS-TL ne'ebé mai hamutuk hodi estabelese rede advokasia saúde importante ida ne'e”, dehan Tom Daley.
Tanba ne’e, Estadus Unidus Amerika sei kontinua atu hamri’ik ho Timor-Leste nu'udar belun no parseiru hodi servisu hamutuk atu haforsa seguransa saúde no hadi'a komunidade nia bem-estar iha teritóriu tomak.
“Ami orgullu bele apoiu ONG lokál sira atu halo advokasia hodi atinje prestasaun saúde ida ne'ebé di’ak liuba Timoroan hotu”, esplika nia.
Ba lansamentu ne'e hetan apoiu husi Estadus Unidus Amerika liuhusi ninia misaun ajensia ba Dezenvolvimentu Internasional (USAID) hanesan parte ida husi apoiu finanseiru milaun $15.6 ne'ebé fornese liuhusi USAID nia Atividade ba Sustentabilidade Sistema Saúde.
USAID fornese asisténsia tékniku no fasilita ona workshop lubun ida hodi loke dalan ba estabelesimentu REBAS-TL.
Governu Amerika nia misaun iha Timor-Leste, liuhusi USAID kontribui fundu milaun $92 hahú tinan 2021 to'o 2025 hodi haforsa ekonomia no boa governasaun iha Timor-Leste.
Desde Timor-Leste nia independénsia, Estadus Unidus Amerika kontribui ona liu milaun $250 hodi apoiu dezenvolvimentu ida ne'ebé inkluzivu no hakmatek, ba Timor-Leste ida ne'ebé prosperu, saudavel, no autosufisiente. (*)
