"Bloku ospitalár ne’e sei iha andar lima no área ho luan besik metru kuadradu rihun haat”, dehan Ministru Finansas, Rui Augusto Gomes, hanesan mós Ministru Prezidensia Konsellu Ministru Interinu, hafoin reuniaun ezekutivu iha Palásiu Governu, kuarta (06/04).

Iha bloku foun ne’e sei oferese instalasaun ne’ebé adekuadu ba nesesidade sira husi númeru pasiente nian ne’ebé aumenta ba beibeik iha HNGV, hodi hadi’a kualidade prestasaun servisu iha país ne’e.

Husi reuniaun KM ne’e, Vise-Ministru Administrasaun Estatál, Lino de Jesus Torrezão, aprezenta mós opsaun polítiku-lejizlativa kona-ba inisiativa kriasaun polítika nasionál ba arkivu públiku no privadu sira. 

“Inisiativa lejizlativa ida-ne’e ho objetivu atu implementa polítika arkivista nasionál, ho estabelesimentu no definisaun ba prinsípiu ne’ebé sei orienta jestaun arkivu, la depende ba formatu, suporte no natureza informasaun ne’ebé kontein iha dokumentu sira instituisaun públika no privada nian”, esplika Rua Gomes.

Entretantu Ministru Koordenadór Assuntus Ekonómikus, Joaquim Amaral, halo aprezentasaun ida kona-ba progresu sira ne’ebé alkansa ona iha prosesu adezaun ba Organizasaun Mundiál Komérsiu (OMK).

Tanba ne’e, aprezenta mós nesesidade apoiu iha nível polítiku no tékniku, ba prosesu adezaun nian, liuliu atu aselera elaborasaun ba lejizlasaun pendente no reforma interna sira, hodi fasilita atividade komersiál sira no kria ambiente ida favoravel ba setór privadu, nasionál no estranjeiru, nune’e bele kumpre prinsípiu jerál OMK nian.

Iha ne’e aprezenta mós roteiru indikativu ida iha faze prosesu tuirmai atu nune’e to’o tinan-nia rohan prosesu adezaun Timor-Leste bele konklui ona. (*)