"Preukupasaun ha'u ko'alia mak ne'e, ita nia veteranu 264 ne'e ita presiza tau atensaun, balun kondisaun struk toba de’it iha fatin, kondisaun sira ne'e mak prezisa hafanu ba tratamentu, maibé difikuldade mak transporte fasilita ami to'o iha ne'eba," dehan Portavoz Klinika Veteranu Baukau, Leonel Guterres iha Reamare, kuarta (06/04).
Veteranu na'in-264 ne'e, kompostu husi Postu Adminisitrativu Baguia 59, Laga 20, Kelikai 21, Venilale 113, Vemase 22 no Baukau vila iha na'in-29.
Maibé, dadaun iha Klinika Veteranu Baukau Ambulansia laiha, difikulta transferensia husi Postu Adminisitrativu ba halo tratamentu iha HNGV Dili no HoREX Baukau.
"Konsellu veteranu Baukau hato'o ona proposta ba Minisitéiru da Saúde (MS), maibé seidauk iha resposta,"nia hatete
Nune'e, Prezidente Konsellu Veteranu Baukau, Fernando Berdu Gusmão, afirma, proposta husu apoiu karreta Ambulansia ida ba MS atu tula pasiente veteranu ne'ebé kondisaun grave iha Postu ba klinika reamare no Ospitál Nasionál Guido Valadares hetan tratamentu, maibé seidauk iha resposta.
"Ami presiza liu-liu karreta, veteranu barak mak katuas hotu ona, balun kilat musan iha sira nia isin laran, sira mai konsulta mós hein karreta labele, entaun sira horibainhira dehan la promote, maibé hein deit, ami agora hein nafatin sira," nia informa
Tuir dadus klinika veteranu baukau, kondisaun moras ne'ebé pasiente veteranu infrenta mak, problema matan iha na'in-383, problema nehan na'in-340, tensaun aas na'in-310, artritis na'in-174, pulmaun króniku na'in-71, gastritis na'in-52, paralisis ou paralizadu na'in-21, rins na'in-21, prostata na'in-9, problema ruin na'in-4 no moras seluk hamutuk na'in-241.
Tuir dadus Konsellu Veteranu Baukau durante tinan-2021 rejistu veteranu mate iha ema na'in-31, enkuantu iha tinan-2022 husi fulan-janeiru to'o abril rejistu na'in-7. (*)
