Diretór Jestaun Merkadu no Turizmu Munísipiu Baukau, Mario Freitas Belo, enkoraja komunidade hotu tenke iha konsensia tau foer iha lixu fatin, atu garante ambiente ida saudavel.

"Tempat sampah (fatin lixu) iha Baukau laran iha Gan-Gan (bairo-bairo) iha hotu, maibé ita komunidade mak laiha konsensia, halo tiha fatin lixu, maibé la so'e foer iha ne'eba (lixu fatin), maibé so'e namkari deit," dehan Mario iha salaun sentru konvensaun baukau vila antiga, kinta (31/03).

Antes ne'e Jestaun merkadu ho servisu ambiental Munísipiu Baukau, fahe informasaun ba komunidade no guarda jestaun merkadu nafatin halo intervensaun, maibé komunidade laiha konsensia kontinua so'e lixu arbiru.

Pontu fokál servisu ambiental Autoridade Munísipiu Baukau, Januario Perreira, kestiona ékipa saneamentu, tanba la raut sedu lixu ne'ebé komunidade akumula iha lixu fatin, nune'e iis, entaun komunidade sunu.

"Tuir lei ordem públiku temi labele sunu (lixu) iha fatin ne'ebé la merese atu sunu, lixu ne'e halibur ba so'e iha lixu fatin ne'ebé ikus," dehan Januario

Husu Autoridade relevante, atu fó edukasaun sivika ba komunidade, tanba lixu iha Munísipiu Baukau liu-liu iha vila nova to'o vila antiga kontinua naklekar. (*)