“Tinan ida ne'e ita kontratu ba sira hamutuk 141, ho durasaun tinan ida no sira servisu iha Programa Malaria, HIV no TBC iha munisípiu 13 inklui RAEOA. RAEOA ita halo tiha ona iha semana rua liuba, depois ida ohin ita halo ba munisípiu Dili nian. Semana ohin ita sei halo ba munisípiu sira seluk atu kompleta númeru ida 141 ne'e”, dehan nia iha Palasíu de Cinzas, Kaikoli, sesta (01/04).

Ho forsa traballu ne'e sira atu haforsa liután sistema saúde, oinsá fó prestasaun di’ak, iha área programa tolu ne'ebé mak iha hanesan programa Malaria, HIV no TBC.

Entertantu iha dadu Ministériu Saúde (MS), funsionáriu públiku iha MS hamutuk rihun-5-resin. Iha rihun-3-resin ne'e rejime espesiál, no rihun-2-resin ne'e rejime jerál.

Admistradór Fundu Globál, Noe Gaspar hatete, Ministériu Saúde hamutuk ho divizaun Fundu Globál, hala'o transferénsia funsionáriu ne'ebé durante ne'e servisu ona iha sistema saúde kuaze tinan 10 ba leten iha programa Malaria, HIV no TBC ne'ebé reforsa tebes implentasaun programa fundu globál nia iha Timor-Leste.

Ho ida ne'e hanesan kompromisiu Governu Timor-Leste nian ba fundu globál katak komesa tinan 2022, funsionáriu ne'ebé mak finasia husi Fundu globál sei tranfere ba sistema saúde hodi reforsa implentasun programa saúde hodi bele garante sutentabilidade programa saúde nian iha futuru.

“Tanba ne'e mak ita-nia Governu liuhusi MS rekruta sira hodi tama iha sistema Governu ninia, hanesan funsionáriu kontratadu. Mas karik iha futuru aplikasaun ba funsionáriu premanente ne'ebé iha sira bele ba aplika hodi sai funsionáriu premanente”, haktenik nia.

Tanba akordu fundu Globál ho MS ne'e hahú iha tinan 2005 to'o 2023 sei kontinua la'o hela, mas esperansa boot, atu tinan 2022 halo komunikasaun ho fundu Globál, iha tinan 2022 bele dezenvolve fali proposta foun hodi kontinua nafatin servisu hodi luta ba povu saudavel iha Timor-Leste ne'ebé saudavel, oinsá atu eradika moras Malaria, hapara moras TBC, nune'e mós ilumina HIV. (*)