Diretora Saúde Munisípiu Dili (SMD), Agustinha Segurado hatete, atividade ne’ebé halo atubele fahe informasaun ba autoridade lokál sira hodi bele kontribui ba prevensaun dengue.

“Desiminasaun ida ne'e atu hafanun nafatin autoridade lokál sira bele hola parte iha informasaun, tanba sira-nia kontribui iha prevensaun dengue importante iha komunidade no oinsá mak sira-nia jestaun lixu iha komunidade nia leet”, dehan Diretora Agustinha Segurado, iha edifísiu Xanana Sport Center, Formoza, kuarta (30/03).

Bainhira dengue ne'e sa’e maka'as iha Dili, saúde mós hasoru hela dezafiu hanesan Covid-19 no inundasaun ne'e afeta servisu ne'ebé iha. Tanba n’e, parte saúde nian protesaun ba dengue lá sufisiente,

Nune’e sai dezafiu ida kontribui kazu dengue aumenta, maibé haree mós ba natureza bainhira parte saúde hakarak halo intervensaun ida ne'ebé di'ak.

“Dengue sa’e maka'as iha Timor, saúde hasoru hela surtu Covid-19 no ita haree mosu inundasaun ne'ebé iha, ita atu haree los fatin ida reall ne'e laiha ona. Maske ita hakarak fatin ne'e moos atu nune'e evita susuk tolun iha fatin, entaun foku iha fatin ida, maibé fatin públiku ne'ebé haree katak susuk dengue moris hela ne'e sabaraut hela”, informa nia.

Ho dezafiu sira ne'e saúde munisípiu Dili nafatin servisu hamutuk ho parseiru sira hodi buka tentativa ida hodi bele halo intervensaun ho di'ak, tanba ne’e saúde husu ba papel autoridade nian atu halo saida nia tenke desimina informasaun ne'e ba komuidade sira.

“Tanba papel autoridade lokál ne'e nia tenke dezamina informasaun dengue ne'e iha aldeia ida, nune'e bele halo intervensaun rotina hodi halo limpeza. Tanba limpeza ne'e sai hanesan pasu importante ida atu kontribui ba parte redusaun kazu dengue ne'e”, afima nia.

Sekretáriu Jerál Cruz Vermella Timor-Leste (CVTL), Luis Pedro Pinto, hatutan, atividade ne'e atu halo desiminasaun informasaun kona-ba kombate dengue nian ba líder komunitáriu sira ne'ebé mak iha munisípiu Dili.

Tanba autoridade lokál sira ne'e mak pilar importante tebtebes, oinsá mak bele partilla informasaun sira ba komunidade.

Ho ida ne'e mak CVTL servisu ho Ministériu Saúde ho administrasaun munisípiu Dili nian, atubele halo desiminasaun informasaun kona-ba dengue nian.

“Asaun ne'ebé ami halo mak kona-ba prevensaun liuhusi desiminasaun informasaun ba komunidade sira, tama uma sai uma para bele fó edukasaun ba komunidade, ida fali mak halo fomigasaun nomós abatizasaun iha komunidade oinsá mak bele hamate susuk dengue ne'e nia tolun, atividade sira ne'e ami halo para oinsá komunidade sira ne'e bele hetan koñesimentu”, esplika nia. (*)