“Iha fulan kotuk ami halo ezersisiu ba Orsamentu Jerál Estadu Ministériu Saúde nian ne'ebé mak Diresaun Nasionál Planu e Finansas aprezenta tabele orsamentu, e ita mós haree katak ba prestasaun do servisu ita halo dadaun, ho ezemplu sira ne'e ita haree, ita investe, ita tenke haruka, gasta 5 milhões ba haruka moras ba rai liur, e ita haruka fali médiku kuba sira mai ita selu 5 mihlões no totál 10 milhões”, informa nia iha Ótel Novu Turizmu, Lesidere, kuarta (09/03).

Tanba servisu rua ne'e nakait ba malu, bainhira investe didi'ak iha Timor-Leste, siknifika osan ne'e la presiza haruka ona moras ba rai liur, maibé atende moras sira ne'e iha ospitál nasionál, ospitál reveral sira ne'e atu populasaun hotu bele hetan atendementu hanesan.

“Tanba prosesu ida ba rai liur la'ós fasil, la'ós ema hothotu bele ba, e la iha kontinuidade ida ne'ebé mak bele asegura katak ema se de'it mak sai, nia fila mai tenke moris, ida ne'e mak ita tenke hanoin hela, di'ak liu ita halo investimentu ita-nia rai laran, iha ita-nia ospitál nasionál, ospitál reveral sira, ou ita presiza ita atu loke tan ospitál, entaun ho aprezentasaun ida ohin ne'e fó mensajen di'ak liuba ita oinsá bele planu di'ak”, esplika Odete.

Maibé agora di'ak ona tanba médiku espesíalista Timoroan sira hahú ba ona iha minisípiu, no presiza haree falta ekipamentu saida, falta ai-moruk saida nune'e fasilita doutor sira bele fó atendementu ba pasiénte sira iha minisípiu duke sira ba ospitál nasionál.

Nune’e mós ba komunidade laiha transporte, sira laiha osan entaun hodi fali servisu hakbesik ba komunidade duke komunidade mak mai buka saúde nia servisu.

“Médiku Kubanu espesíalista agora iha, ema la to'o ona na'in-300 iha Timor, menus, tanba ita reduz médiku jerál ita la presiza maibé médiku espesíalista de'it mak ita presiza”, deklara nia.

Pasiénte barak mak halo tranferénsia tanba iha Jakarta ho situasaun Covid-19, singapura Ministériu Saúde la haruka maibé Malázia sei haruka ida rua tanba ho situasuan Covid-19, la bele haruka barak maibé sira sempre sai to'o 50 depende ba kazu.

“Pasiente iha ema boot mós iha, iha povu baibain mós iha, soke ita la bele atende hotu tanba dalaruma ita tenke haree aviaun, tanba aviaun komersial mós seidauk iha, aviaun sira ne'e mai kedas ho oráriu, tanba relasiona ho Covid-19 ne'ebé la bele atende hotu, se ita halo iha ne'e ema hothotu bele hetan”, dehan nia. (*)