Login to your account

Username *
Password *
Remember Me

Items filtered by date: Tuesday, 04 May 2021

Tempotimor (Dili)-Pasajeiru timoroan hamutuk ema na'in 16 ne'ebé kansela viájen ba Portugal, iha loron 18 fulan-abril tinan 2021, ezije ba ejénsia Narpov Unipessoal L.da atu devolve (fó fila) osan ba billete.

Pasajeiru sira ne’e, ezíje ajénsia, tanba viajen ne’ebé halo hetan kansela husi servisu imigrasaun iha Aeroportu Internasionál Nicolau Lobato, Komoro, loron 18 fulan-abril tinan 2021.

Tuir rute viájen iha billete mak Dili, Malázia no Portugal, maibé to'o iha Aeroportu Komoro, migrasaun sira halo revista ba viájen, rute hatudu fali Dili, Malazia, Barcelona, no Portugal, nune'e halo kanselamentu ba sira, ho razaun liuhusi Barcelona ema la simu, tanba situasaun covid-19 no ema la autoriza tama.

Hafoin kansela viájen ba Portugal, iha loron 22 fulan-abril tinan 2021, pasajeiru sira konsege halo aproximasaun ho responsavél ajénsia Narpov Unipessoal, Lda hodi ezije foti osan ne'ebé uza sosa billete aviaun.

Durante aproximasaun, Diretór ajénsia Narpov Unipessoal, Lda, José Alexandre Guterres halo akordu ho pasajeiru sira no promete sei devolve hikas osan iha semana rua laran, sura husi data asina akordu nian.

Bazeia ba akordu ne'e, iha loron 04 fulan-maiu tinan 2021 ne'e, pasajeiru sira ba fali iha ajénsia nia fatin atu foti osan tuir konkordánsia ne'ebé halo ona.

Maibé, Diretór Ajénsia Narpov Unipessoal, Lda, José Alexandre Guterres, la kumpri akordu ne'ebé halo no ameasa koa pasajeiru sira ba servisu administrasaun.

Pasajeiru ne'ebé kanseladu viájen ba Portugal, Armanda de Fátima Soares Doutel, lamenta ho desizaun husi diretór ajénsia nian, tanba fó opsaun rua ba sira atu hili hodi koa osan entre US$250, no koa UU$500.  

“Ami 16, atu dehan katak iha akordu ida ne'ebé ami halo iha kantor polísia katak nia sei fó devolve ami-nia osan iha dia 04 ohin, ne'ebé ami hothotu ohin marka prezensa iha ne'e, atu mai foti ami-nia osan. Mas nia dehan de'it katak, nia sei koa fali ami-nia osan iha US$500, ka US$250. Ida ne'e ba ami la simu, tanba ami seidauk halo cheecking, ou bording past. Ida ne'e mak halo ami la simu nia hakarak”, afirma Armanda iha Aldeia Zero 02, Suku Fatuhada, Postu Dom Aleixo, munisípiu Dili, tersa (04/05).

Ezijénsia ne’e hato’o tanba hakarak husu filafali osan ne’ebé uza hodi sosa ona billete husi ajénsia no husu atu devolve osan ho kompletu.

“Ami hatama US$1995, ida ne'e ami-nia tiket, inklui covid ho hán aviaun nian. La konsege, ami cheecking de'it mós laiha, e boarding past de'it mós laiha. Ami buat hotu laiha, ami fila kanselamentu husi imigrasaun. Klaru ami ezíje atu fó direitu tomak tuir osan ne'ebé molok ne'e ami hatama”, dehan nia. (*)

Published in Ekonomia

Tempotimor (Dili)-Deputadu no funsionáriu inklui seguransa iha Parlamentu Nasional obrigatóriu tuir teste Swab ba daruak, tanba konsidera funsionáriu balun iha PN hahú infetadu covid-19.

Deputadu bankada UDT, Francisco David Xavier hatete, teste Swab ne’ebé sira simu ne'e hanesan faze ida atubele idenfitika kauza husi sutru covid-19.

“Ema infetadu,  ka pozitivu ne'e iha tiha ona, tanba ami ne'e iha fatin ne’ebé hamutuk ne'e mak obrigatoriumente ami tenke teste swab, atubele hatene, karik buat ne'e alastra tiha ona mai ami, ida ne'e mak ami halo hela ba segunda ves”, hatete nia ba www.tempotimor.com  iha PN, tersa (04/05).

Maibé, Deputadu UDT ne'e prontu atu izola aan wainhira deteta pozitivu ba covid-19. Tanba, kazu covid-19 nu’udar inimigu invijivel, bainhira pozitivu tenke submete ba izolamentu hodi halo tratamentu saúde.

“Se deteta pozitivu automatikamente sei ba kurantena no sala izolamentu para halo tratamentu tanba buat ne'e husi reprezentante povu ami mak hasai ezemplar ba sidadaun hothotu”, afirma nia.

Iha fatin hanesan Deputada Bankada FRETILIN, Lídia Norberta informa, teste swab ne'e ba deputadu 65, inklui funsionáriu no motorista tomak.

“Ohin ne'e ba funsionáriu hotu, motorista, seguransa, deputadu, iha PN”, dehan nia.

Entretantu kazu infetadu covid-19 ne'e dadaun da'et ona ba Asesor Bankada FRETILIN no Komandante Seguransa PN no dadaun submete ona ba sala izolamentu. (*)

Published in Saude

Tempotimor (Dili)-Komandu Polísia Nasionál Timor-Leste (PNTL) apliika nafatin dekretu governu ne’ebé implementa serka sanitáriu no konfinamentu domisiliáriu obrigatóriu jerál.

Maibé dezentendimentu entre komunidade ho Pólisia Nasionál Timor-Leste (PNTL) bainhira hala’o teste swab husi sentru Integradu Jestaun ba Krize (SIJK) iha Sentru Formasau polísia Komoro, tanba la sastifas ho atendementu.

Portavoz Komandu Jerál Polísia Nasionál Timor-Leste (PNTL), Superintendente xefe Arnaldo de Araújo hatete, PNTL implenta hela dekretu governu númeru 14/2021 medida ezekusaun estadu emerjénsia nian no konfinamentu domisiáriu jerál.

“Orientasaun ne'ebé komandu fó sai tun mai iha membru sira iha terrenu atu implenta, halo tuir mak hanesan halo cek point aumesmu tempu ema sira ne'ebé mak atravesa liuhusi cek point ne'e bolu hotu mai swab”, dehan Arnaldo iha Sentru Formasaun PNTL, Komoro, tersa (04/05).

Ho atividade ne’e atu hamenus movimentu ema hotu, tanba dadaun ne’e iha situasaun konfinamentu domisiáriu jerál, mak ema hotu tenke iha uma no labele sai.

Maske, iha komunidade balun koopera, balun lae, tanba hakarak fila uma lalais to’o mosu dezentendimentos entre PNTL no komunidade. Maibé komunidade la sastivas tanba fatin ne'ebé limitadu PNTL husik duni komunidade balun liu de’it.

"Não quer dizer sira fila lahetan ona swab, la’e. Karik Polísia hetan iha dalan sira mós tama hotu iha swab ida ne'e”, dehan Arnaldo.

Husi observasaun www.tempotimor.com nota kata iha komunidade balun mak halo protestu tanba la sastivas ho atendementu PNTL no komunidade balun la tuir teste swab.

Entertantu ohin PNTL hamutuk ho SIJK hahu implenta cek point aumesmu tempu teste swab ba komunidade sira ne'ebé halo movimentu iha área Komoro Sentru Formasaun PNTL Dili. (*)

Published in Seguransa Defesa

Tempotimor (Dili)-Governu liuhosi Ministériu  Saúde (MS) deside hodi muda pasiénte sira ne’ebé hatudu ona rezultadu teste swab negativu hodi kontinua halo tratamentu saúde iha Hospitál Nacional Guido Valadares (HNGV).

Tanba, MS prepara ona fatin iha HNGV hodi muda sai sidadaun ne’ebé rekuperadu iha izolamenu Vera Cruz, maibé ba sira ne’ebé mak test Polymerase Chain Reaction (PCR) negativu ona hodi kontinua halo tratamentu ba moras seluk. 

“Sim, loos duni katak Hospital Nacional Guidu Valadares iha hela fatin, tanba pasiénte sira ne'ebé mak ita halo tratamentu iha Vera Cruz oras ne'e sira-nia teste PCR ne'e negativu ona maibé ninia paru paru sei estraga hela entaun sei dependente ba oxijéniu ne'e ita bele muda ba HNGV laiha problema”, hatete Ministra Saúde, Odete Maria Freitas Belo, iha rezidénsia Primeiru MInistru, Farol, tersa (04/05).

Sidadaun ne’ebé ba HNGV ho rezultadu negativu sei la fó impaktu ba ema seluk, no laiha ona virus ne’ebé hada’et.

Tanba moras hothotu ne'ebé mak iha perigu ba ema nia saúde, maibé maneira atu atende ba kada moras mak la hanesan.

“La fó impaktu tanba se virus negativu ona ne’e atu  da'et oinsá?. Agora virus laiha ona, ita trata nia hanesan pasiénte baibain”, dehan nia. (*)

Published in Saude

Tempotimor (Dili)-Ministru Asuntu Parlamentar no Komunikasaun Sosiál (MAPKomS), Francisco Martins Jerónimo, husu ba mídia konvensioná sira atu ajuda Governu hodi counter (hasoru) informasaun hoax (falsu).

Tanba ne’e, sei halo aprosimasaun ho mídia sira atu husu ajuda ba governu oinsá mak bele hasoru informasaun falsu ne’ebé ema lansa iha mídia sosiál.

“Ministériu hahú hanoin atu bolu entidade hothotu, ko'alia kona-ba hoax, entaun ami hanoin katak tenke halo aprosimasaun ho mídia sira, atu husu sira ajuda governu halo nusa mak bele Counter ho informasaun sira hoax ne'e”, dehan Ministru Francisco Jerónimo iha Bebora, tersa (04/05).

Maske, dadaun ne’e iha Parlamentu Nasionál haree hela lei kona-ba Cybercrime ka lei sibernétika atu sai baze, tanba lei komunikasaun sosial de'it labele regula hotu.

“Entaun governu apelu nafatin ba entidade hothotu, liuliu ba jornalista sira katak bainhira hatun informasaun ruma tenke kualidade, atu nune'e ema gosta nafatin ita-boot sira nia servisu no ita-boot sira-nia informasaun”, hatete nia.

Haree ba mídia televizaun, jornal, online kompara ho média sosiál, nia kuantidade informasaun boot, maibé nia kredibilidade ne'e ladún, maibé televizaun, jornál no online iha informasaun natón kredivel, tanba ne’e mak sai problema. (*)

Published in Politika

Tempotimor (Dili)-Governu Austrália deside entrega Vasina AstraZeneca hamutuk 10.000 doses ba Governu Timor-Leste liuhusi Ministériu Saúde, iha loron kuarta (05/05) aban.

Maske apoiu ne’e deside atu entrega, maibé seidauk iha oras no fatin ne’ebé fiksu.

" Aban ita sei simu vasina ne'ebé apoiu husi Austrália, ita sei hetan 10.000 doses ba Covid 19 nian”, informa Ministra Saúde Odete Maria Freitas Belo, hafoin halo enkontru ho Primeiru Ministru iha Faról, tersa (04/05)

Apoiu ne’e, mai husi kooperasaun bilaterál entre nasaun Timor-Leste ho Austrália durante ne’e.

Tanba, iha loron 19 fulan-abril Timor-Leste mós sei hetan tan 10.000 doses no hetan mós Covax facility, maibé apoiu vasina Sinovac husi Xina ne’e seidauk iha loron fiksu.

“Iha loron 19 ita mós sei simu tan 10.000 doses no iha tempo hanesan ita mós prepara atu simu Covax Facility no hetan mós apoiu husi nasaun Xina Sinovax maibé seidauk determina data fixu”, dehan nia. (*)

Published in Saude

Tempotimor (Dili)-Deputada Bankada Congresso Nacionál de Reconstrução de Timorense (CNRT), Carmelita Caetano Monis, kestiona Prezidente Repúblika (PR), Francisco Guterres ‘Lú Olo’, halo nomeasaun Politika hodi estende mandatu Prezidente Tribunal Rekursu (TR), Deolindo do Santos ba dala-rua.

Tanba durante kaer pasta nu’udar prezidente tribunal rekursu, hamutuk ho prezidente KFP, Fuastino Cardoso komete hela kazu Komusaun Nasional Ba Eleisaun (CNE) ne’ebé dadauk prosesa hela iha tribunal.

“Ha’u hakfodak kuandu, estende tan mandatu ba segundu mandatu. Ne'ebe ha’u kestiona tebes ba tratamentu ne’ebé la hanesan ba nomeasaun politika husi Prezidente Republika rasik, hili doutor Deolindo do Santos ne’ebé nia mós iha prosesu hanesan ho Doutor Faustino, iha hotu prosesu investigasaun kriminal nia laran ba kazu CNE”, dehan nia iha Plenáriu Parlamentu Nasional (PN), segunda (03/05).

Tanba realidade hatudu iha tinan 2017, wainhira Prezidente Republika halo nomeasaun ba membru governu sira, ba VII governu, Prezidente Republika la halo eskrimin hodi kontinua fó pose ba ema sira ne’ebé mak iha prosesu hela iha instituisaun judisiáriu.

Enkuantu iha fali mandatu VIII governu iha tinan 2018, prezidente republika muda politika hodi halo eskrimin, ne’ebé konsege rezulta membru na’in-7 husi partidu CNRT ho membru na’in-rua husi partidu KHUNTO, la hetan pose durante oitavu governu ne’ebé mós envolve husi partidu CNRT rasik.

CNRT la kestiona Konpeténsia própria eskluziva PR nian ba nomeasaun ne'e, maibé kestiona mak inkonsisténsia desizaun politika hirak ne'e,

Hatan ba kestaun ne'e, Deputadu bankada FRETILIN, Antoninho Bianco konsidera CNRT kestiona no kesar bebeik prezidente Republika maibé sempre lakon.

Tanba ne'e, sadik deputada CNRT, sente prezidente Republika inkonsisténsia ba nia desizaun, di’ak liu keixa dala ida tan ba Ministériu Públiku.

"Ha’u-nia kolega deputadua kestiona bebeik kona-ba prezidente republika no partidu Fretilin, ne’ebé ha’u nu’udar reprezentante Fretilin, akompaña deklarasaun CNRT nian, kestiona PR, kesar bebeik, maibé nunka manán. Se ita-boot sira sente katak inkonsisténsia karik kesar tan dala ida, ne'e mak ita labeke ko’alia de'it, kesar tan ba”, hatete nia.(*)

Published in Politika
Page 2 of 2
Darwin_Optic

.

Contact us

Palapasu
Dili, Timor-Leste
+670 7723 4852
+670 7728 1698
http://www.tempotimor.com

Kalendariu Arkivu

« May 2021 »
Mon Tue Wed Thu Fri Sat Sun
          1 2
3 4 5 6 7 8 9
10 11 12 13 14 15 16
17 18 19 20 21 22 23
24 25 26 27 28 29 30
31            

Tempo Timor Networks

Online Counter