“Ohin ha'u atualiza ba Prezidente Republika kona-ba proposta lei rejistu sivíl, Konsellu Ministru aprova tiha ona, diploma ne'e iha hela Parlamentu Nasionál, ha’u hein de’it, Komisaun A bolu Ministru Justisa atu ba halo diskusaun espesialidade, e hein katak Parlamentu aprova lei ne'e, lori mai Prezidente Republika atu promulga”, dehan Ministru Manuel Cárceres ba jornalista sira hafoin enkontru ho PR Lú Olo iha Palásiu Prezidensiál Bairopite, segunda (21/02).
Ba kristaun protestante, musulmanu nia pozisaun, Ministériu Justisa la halo diskriminasaun, maibé kumpri lei ida sira uluk halo ne'e, lei kódigu sivíl ne'e promulga iha tinan 2011.
“Ita-nia artigu iha 1474 ho 1475, ne'e hatete katak, rekoñese de'it kazamentu Katóliku ne'e, la'ós kazamentu relijiozu, kazamentu relijiozu karik, Musulmanu, Buda, Hindu, sira ne'e tama hotu, maibé iha lei kódigu sivíl ne'e hatete rekoñese de’it kazamentu Katóliku ho kazamentu barlakiadu, ne'ebé la'ós Ministru Justisa mak halo diskriminasaun”, esplika nia.
Antes ne'e, Prezidente Igreja Evanjélica Assembleia de Deus Timor-Leste, pastor Francisco dos Reis hatete, Ministériu Justisa (MJ) diskrimina hela sertidaun kazamentu husi kristaun protestante.
“Ministériu Justisa halo faktu diskriminasaun mak la aseita protestante nia modalidade sertidaun kazamentu ne'e faktu diskriminasaun momoos”, dehan nia.
Tanba difikulta dokumentu Kristaun protestante sira atu halo trata dokumentu bainhira sira hakarak la'o ba nasaun sira iha Inglaterra no Irlándia.
Alende ne'e, Konsellu Ministru aprova ona projetu dekretu lei ne'ebé aprezenta husi Ministru Justisa, Manuel Cárceres ne'ebé atu hahú alterasaun daruak ba kódigu prosesu sivíl nian no aprova ona husi dekretu lei númeru 1/2006 loron 21 fulan-fevereru no altera ona husi lei númeru 6/2021 loron 31 fulan-marsu.
“Dekretu lei ne'e Governu ho autorizasaun lejislativa ne'ebé fó husi Parlamentu Nasionál liuhusi lei númeru 3/2021 loron 2 fulan-marsu sei fó fleksibilidade ida ne'ebé boot liuba faze saneamentu husi prosesu nian liliu kona-ba preparasaun audénsia diskusaun julgamentu no sei kontribui ba dezkonjestionamentu justisa sivil”, dehan Ministrun Prezidensiál KM, Fidelis Leite Magalhães. (*)
