“Ohin ha'u informa ba Prezidente atu implementa lei 13/2017, iha ona pakote diploma lubuk ida ke ita prepara e atu to'o ba nia intensaun finál, atu fó titlu prioridade ka sertifikadu rai ba ita-nia sidadaun sira, ita presiza dekretu lei 3 (tolu) tan, no dekretu lei tolu ne'e, iha ona Konsellu Ministru”, dehan Ministru Manuel, hafoin hasoru malu ho PR Lú Olo iha Palasíu Prezidensiál Bairopite, segunda (21/02).
Ba dekretu lei kona-ba rejistu kredestrais, ne'ebé Konsellu Ministru aprova ona, halo ona harmonizasaun finál iha Ministériu Prezidente Konsellu Ministru, atu hasa'e ba iha gabinete juridika Prezidente Repúblika, hein promugasaun husi Prezidente Repúblika.
“Dekretu lei ida seluk kona-ba informasaun kadestrais, informasaun kadestrais ne'e hanesan ita ba sukat ema nia rai karik, ita tenke hasai rai, rejistu rai sira ne'e, para depois aban bairua na'in ne'e presiza ou hakarak hetan sertifikadu karik husi informasaun ne'e mak ita fó sertifikadu ba nia”, esplikaa nia.
Nune'e dekretu lei ida ne'e iha ona faze harmonizasaun hein Konsellu Ministru, iha fulan-fevereiru ne'e la bele karik, hein fulan-marsu Konsellu Ministru aprova dekretu lei haruka ba Prezidente Repúblika hodi hein promugasaun.
Dekretu lei ikus liu atu implementa lei númeru 13/2017 maka rejime juridiku atu fó direitu ba sidadaun nasionál sira, uma sira ne'ebé okupa kleur ona, uma estranjeiru sira husik hela iha Timor, sidadaun sira okupa kleur tiha ona e sira ne'ebé kontratu aredamentu ho Estadu.
“Sira ne'ebé iha kontratu aredamentu ho Estadu, Estadu hanoin atu foti tiha uma sira ne'e, fó ba ita-nia maluk sidadaun timoroan sira, para fó tiha sertifikadu ba sira, ne'e fó seguransa juridiku ida ba ita-nia sidadaun sira, fó mós esperansa ba sira katak, sira selu arendamentu ba Estadu maibé, sira la selu saugati de'it, Estadu rekoñese sira-nia direitu, tanba ne'e mak estadu fó tiha titulu ba sira”, esplika nia.
Maibé fó de'it ba rezidénsia bens e moves ba sidadaun sira ne'ebé halo kontratu aredamentu ho Estadu, la'ós sira ba tur iha rai Estadu nian, reklama dehan ninia rai, depois Estadu foti sertifikadu fó ba nia.
“Ne'ebé dekretu lei 3 ne'e, ha'u ohin esplika ona ba sua eselénsia Prezidente Repúblika, señor prezidente mós simu, hein de'it kuandu Konsellu Ministru haruka mai Prezidente Repúblika haree bele promulga dekretu lei sira ne'e”, informa nia. (*)