“Ha'u prontu kualker tempu bainhira Ministériu Públiku ba investiga ou ba hatán, prontu iha kualker tempu tanba projetu ne'e bilateral kooperasaun entre Governu Xina ho Timor-Leste la'ós projetu Timor-Leste nian”, dehan nia hafoin enkontru ho Primeiru Ministru, Taur Matan Ruak, iha Rezidénsia ofisiál Faról (08/02).
Tanba Set Top Box ne'ebé mak dadaun ne'e sai polémika boot, ne'e Governu Xina mak oferese ba Governu Timor-Leste hodi halo instalasaun iha Timor-Leste.
“SetTop Box ne'e mós Governu Xina nian ne'e mak haruka mai atu halo instalasaun ne'ebé prontu iha kualker tempu”, afirma nia.
Ministériu Assuntu Parlamentár no Komunikasaun Sosiál la sente iha lakunas ka kazu ruma relasiona ho projetu Set Top Box ne'e.
"Laiha, buat ne’e depende ba Ministériu Públiku dehan sei iha lakunas hotu KAK (Komisaun Anti Korrupsaun) dehan sei iha lakunas hatete mak ami halo esplikasaun”, deklara nia.
Ho ida ne’e Ministru deklara durante ne'e mídia privadu ida mak tuir hela de'it maibé nia parte prontu hasoru sira no la tauk atu ba hatan iha ne’ebé de’it.
“Tanba hakarak oho ema nia karater ne'e halo hanesan ne'e, Tanba Mídia Hatutan mak loroloron tuir ha'u, bainhira mak nia tuir ha'u to'o hotu”, hatete nia.
Enkuantu Governu Xina oferese Set Top Box ba Timor-Leste hamutuk 31.500, no iha faze dahuluk sei instala uluk 30.004, iha Munisípiu Dili, Likisá, Postu Administrativu Kailaku, Munisípiu Ermera, Postu Administrativu Laulara, Munisípiu Aileu, nomós Postu Administrativu Kailaku, Munisípiu Bobonaro.
Projetu instalasaun STB ba faze dahuluk ne’ebé xhala’o husi Kompaña Dili Eternal Innovation Information, hahú iha tinan 2019 no instala iha 2021 to’o fulan-abril 2022.
Projetu instalasaun Set Top Box ne’e nu’udar komponente ki’ik ida husi projetu Dijitál Teresteriál Multimedia (DTMB), tanba iha buat rua ne’e importante loos mak Hardware installation, no software installation.
Kona-ba Hardware installation ne’e atu halo instalasaun ida fíziku, no software installation ne’e sensitivu oituan, tanba iha ne’ebá sei tau ema nia naran, númeru telefone buat hotu iha ne’ebá, no ida ne’e Governu labele bosok, tanba ida ne’e sei iha SERVER ida iha RTTL.ep, atubele kontrola. (*)
