Tempotimor (Dili)-Ofisiál Outreach Organizasaun Asian Justice and Right (AJAR), Inocêncio Xavier, deskonfia Ministériu Públiku (MP) liliu Gabinete Kombate Korrupsaun tauk lakon poder tanba durante ne'e abandona hela kazu Ró Haksolok.

"Ami dezafia Ministériu Públiku liliu ida Gabinete Kombate Korrupsaun ne'e, halo servisu ka la'e, barani ka la'e foti risku ba situasaun ne'e, ka imi tauk lakon poder”, deklara nia ba www.tempotimor.com iha nia kna’ar fatin, Farol, sesta (04/02).

Kazu Ró Haksolok ne'e, sosiedade sira ejize bebeik ona ba Inspetór Jerál Estadu, no Ministériu Públiku, ba kazu ne’ebé tama ona iha mandatu Komisaun Anti Korrupsaun (KAK) ninian, bele halo investigasaun, tanba ne'e iha tentativa ba komete Korrupsaun, no defaktu Rogerio Lobato rasik mós fó sai ona vídeo iha mídia sosiál (facebook) katak Ró dodok ona, fatin ne’ebé mak uza ba konstrusaun Ró kuaze la uza ona.

Ministériu Públiku mak nu’udar na'in ba asaun penál, KAK hala'o tuir de'it atribuisaun mandatu husi Ministériu Públiku.

Ho ida ne’e, presiza halo investigasun atu nune'e travaa orsamentu adisional ne’ebé Governu prevé iha tinan 2020 hamutuk milaun $14 atu finalizasun Ró Haksolok.

Haree husi kustu ba adisional ne’ebé mak iha, boot liu fali kustu inisiál ne’ebé mak ho montante millaun $13.

"Agora husu tan $14 milhões ne'e ba osan saida, orsamentu adisional boot liu fali orsamentu inisiál ne'e buat ruma ke laloos”, afirma nia.

Nune'e husu ba Ministériu Públiku atu halo investigasaun, tanba momentu ne’ebé mak Governu no Prezidente Autoridade RAEOA hato'o dehan garante iha fulan-agostu 2021 Ró sei to'o mai, maibé realidade la akontese.

"Ita haree fali mós novidade oin seluk fali. Karik señor Rogeiro Lobato ko’alia de'it, ita bele fiar, ou la fiar, maibé ne'e mai ho kedas vídeo ida konkretamente hatudu Ró nia kondisaun,fatin ba konstrusaun Ró ne'e mós ita haree la trata tiha ona (tidak di urus), ne'e ita atu halo saida, nusa la gasta osan ne'e ba phadi'a povu nia moris”, hatete nia. (*)