Defensór Públiku José Delima hatete, Ministéiru Públiku akuza eis PAM Baukau ne’ebé rejistu iha TDB ho Nuc.0006/19.PGGCC ba krime Administrasaun Danosa previstu iha artigu 274.
"Julgamentu kuaze tinan-ida horseik (02/02/2022) desizaun ne'ebé tribunál kolektivu foti mak fó absolvesaun totál ba projetu venilale mós hotu ona, ida ne'e mós hotu ona ba arguido António Augosto Guterres no mós ba nia ékipa tekníku husi ADN ho KDD," dehan José iha kna'ar fatin vila nova Baukau, kinta (03/02).
Tanba, krime ne'ebé akuza ba eis PAM Baukau kona-ba projetu estrada ho Km-3 iha Postu Administrativu Baguai Uakala ba periodu tinan 2013 ba tinan 2014, ne'ebé hanoin estadu lakon prezuiju ho orsamentu montante US$77,478.88, maibé durante Tribunál haree provas produsaun hotu lahatudu estadu hetan prezuiju orsamentu ne'ebé MP tau iha akuzasaun laran, tanba ne'e Tribunál foti desizaun hodi absolve.
Kazu refere aprezenta husi komunidade sira ba iha Komisaun Anti Korupsaun (CAC-sigla portugues), nune'e koloka enjeñeiru sira ba tereñu hodi halo fiskalizasaun aprezenta iha MP hodi transforma sai akuzasaun hodi aprezenta iha Tribunál, maibé ikus mai la hatudu estadu hetan prezuiju ba orsamentu montante US$77,478.88.
"Sira muda iha item ne'e, (projetu estrada), tanba item ne'ebé mak la liu 30 pursentu, entaun ne'e kompetensia husi ADN ho KDD nia kompetensia se orsamentu liu 30 pursentu mak enkamiña ba nasionál hodi estuda bele halo alterasaun ba item, momentu iha ne'eba la to'o iha ne'eba, tanba ko'alia kona-ba pursentu ne'ebé estabele iha regra distritu katak, labele liu 30 pursentu, entaun osan ne'ebé iha BQ laran mantein nafatin la'o nafatin ho ida ne'e," nia esplika
Tanba ne'e, bainhira Tribunál fó konkluzaun provas hotu ne'ebé akuza ba eis PAM Baukau ho tekníku sira la hatudu sira halakon osan montante US$77,478.88, tanba projetu refere halo de'it alterasaun mudansa ba item sira iha Munisípiu.
"Nia (eis PAM Baukau) hanesan koordenador KDD, tanba iha nia área nia kompetensia ne'e simu relatóriu de'it, wainhira iha mudansa mós sira halo tiha mudansa mak foin parte tekníku sira fó relatóriu ba nia kona-ba mudansa ou halo alterasaun item, nia laiha podér atu deside halo alterasaun bele ga labele mós nia laiha kompetensia, tanba de'it nia hanesan koordenador KDD," nia afirma
Nune'e, eis PAM Baukau, António A. Guterres hatete, hanesan sidadaun kopéra di'ak durante prosesu tomak ba julgamentu kazu Administrasaun Danosa iha Tribunál Distritál Baukau.
"Kualker aktus saidá de'it mak sidadaun insatisfas ba aktividade iha tereñu tuir observasaun ema ida ema rua lasatisfas to'o iha ne'eba, ami responsabiliza iha Tribunál nia finalidade mak hatudu absolve," nia hatete
Tuir lolos (eis PAM Baukau) sai hanesan testamuña ne'ebé iha tekníkamente sira halo alterasaun bazeia ba dekretu lei Nu.11,13 no mós preimeira alterasaun dekretu lei 116 no artigu 34.4 kna'ar Administrativamente tekníkamente halo mudansa ba BQ dezeñu tuir kondisaun.
Maibé, regras refere lakomprenside ema barak ,nune'e mosu insatisfas implementasaun mudansa sira lori ba to'o iha Tribunál.
Enkuatu julgamentu ne'e, prezide husi juíz Sribuña ho nia adjunta Juíz kolektivu, José Escurial, reprezentante Ministéiru Públiku, Aderito Tilman, ho Defensór Públiku, José Delima. (*)
