Ministru Prezidénsia Konsellu Ministru (MPKM), Fidelis Leite Magalhães hatete, mesmu Timor-Leste laiha armas Nuklear maibé bandu atu labele halo armas Nuklear sira iha Timor-Leste.

"Tuir mai Governu mós ohin aprova rezolusaun Parlamentu Nasionál (PN) kona-ba proibisaun Armas Nuklear, balun husu tanba sa ita-nia Armas Nuklear laiha maibé ita bandu, adezaun ida ne'e importante tanba, Timór hanesan nasaun soberanu ida, hato'o ninia pontu de vista, kona-ba uzu no kontra reliferasaun kona-ba Armas Nuklear iha mundu”, dehan nia iha Palásiu Governu, kuarta (02/02).

Entaun, husu ba nasaun boot sira ne'ebé uza Arma Nuklear sira atu labele espalla liután nomós uza armamentu sira ne'e karik ba nasaun sira ne'ebé mak boot, kuandu uza arma Nuklear sei fó risku ba umanidade nomós nasaun ki’ik sira hanesan Timor-Leste.

"Mesmu ke ita laiha armas Nuklear, ita laiha misses sira maibé importante mak Timor hanesan membru ida husi komunidade internasionál toma pozisaun ida ho ida ne'e mak Governu ohin aprova Konvensaun sira ne'e tenke haruka ba Parlamentu”, afirma nia.

Hafoin ida ne'e mak haruka projetu rezolusaun ida ne'e ba Parlamentu Nasionál hodi halo deliberasaun, bainhira PN aprova hanesan rezolusaun parlamentár ida. (*)