Tanba publikasaun relatóriu krime violasaun ka segredu justisa ne’ebé akontese, deskonfia envolve eis-Diretór Komisaun Justisa no Paz (KJP) Dioseze Dili, arguidu Padre Hermínio Fátima Gonçalves no arguidu José Cardoso Moreira, Andre Gonçalves no arguida Libania Martins Amaral.

Durante iha prosesu julgamentu, jornalista António Sampaio rekoñese públikasaun nutísia ida kona-ba relatóriu husi Komisaun Justisa Páz Dioseze Dili nian, maibé fonte husi nutísia ne’e mak hanesan deklarasaun Prokuradór Jerál Repúblika (PJR) tempu ne’ebá José da Costa Ximenes, nomós sita referénsia husi dokumentu kona-ba relatóriu peskiza husi KJP, inklui fonte kredivel ne’ebé fó sai katak rezultadu relatóriu ne’e loos.

Ba faktu hirak ne'e, nu’udar jornalista, hala’o kna’ar bazeia de’it ba kódigu étika jornalistika ne’ebé garante fonte segredu, tanba ne’e António Sampaio la bele temi ema ka fonte ne’ebé mak fó dokumentu rezultadu ba relatóriu ne'e.

Iha momentu ne'eba relatóriu KJP ne'e, Jornalista António Sampaio hetan kopia tahan ida, maibé konteúdu notísia bazeia ba deklarasaun PJR ho konteúdu ba prosesu akuzasaun ba kondenadu eis Padre Ricard Dashback.

Hafoin rona tiha sasin husi Jornalista Ajensia Notisioza Portugues (LUSA), Tribunál Distrital Dili kontinua rona Sasin José Antonio Belo ne’ebé iha tempu ne’ebá hanesan Diretór Tempu Timor Ba publikasaun notísia kona-ba relatóriu KJP.

Iha julgamentu ne'e, eis-Diretór Tempo Timor, José Antonio Belo hatete, bainhira hetan dokumentu relatóriu kona-ba KJP, iha momentu ne’e kedas, hanesan jornalista esforsu tenta konfirma ho parte KJP dala-rua, maibé laiha resposta.

Tanba ne’e nia parte haree no halo rezumu ba relatóriu ne’e hodi publika, tanba interesante tebes, no rezultadu peskiza diferente ho kazu ne’ebé antes ne’e iha ona relasiona ho kazu eis padre kondenadu Ricard Dashback, segundu konteúdu relatóriu ko’alia kona-ba mafia justisa.

"Iha relatóriu ne'eba ne'e Komisaun Justisa Paz halo investigasaun ba kazu ida ne’ebé akontese iha Topu Honis, ne’ebé kontra Eis Padre ida, iha ne’ebé iha relatóriu laran konsta, labarik lubuk ida nia naran, ne’ebé mak iha momentu ne'eba Tribunál investiga hela, e halo prosesu ba kazu refere”, dehan José Belo hafoin presta deklarasaun iha TDD, kuarta (26/01).

Maibé iha momentu ne'e, bainhira rona fali deklarasaun husi Dioseze, iha ne’ebé dioseze rasik husu deskulpa ba públiku kona-ba publikasaun rezultadu relatóriu entaun nu’udar jornalista deside la kontinua halo notísia.

Hafoin rona sasin na’in-rua, Tribunál deside hodi kontinua julgamentu ba loron seluk atu rona sasin husi parte relavante ba kazu refere.

Audiénsia iha julgamentu ne’e prezide husi juiz singular Evangelino Belo, Ministériu Públiku reprezenta husi Prokuradór Matias Soares no arguidu sira hetan asisténsia legal husi Advogadu privadu Miguel Faria. (*)