"Sim, depois de halo indentifikasaun, iha na’in-5 mak sai autór prinsipál, sira seluk ida na’in-4 ne'e ita liberta tiha, nune'e na’in-5 ne’e ita-nia parte investigasaun, halo ona partisipasaun”, dehan Komandante PNTL Munisípiu Díli, Superintendente Xefe, Henrique da Costa, iha komandu munisípiu Dili, sábadu (22/01).
Hafoin akontesimentu, Komandu PNTL Díli, liuhusi Eskuadra Dom Aleixo hamutuk ho Forsa Rezerva, halo kedan atuasaun hodi kaptura suspeitu hamutuk na’in-sia (9).
Maibé rezultadu identifikasaun, iha suspeitu na’in-lima (5) mak sai autór ba iha konfrontu ne'e, no na’in-4 seluk, Polísia haruka fila.
Nune'e ekipa investigasaun Eskuadra Dom Aleixo nian kontinua hela prosesu no rejista NUC (Número Criminál) 0029/2022/16 Janeiru.
"Sim dadaun ne'e prosesu hirak ne'e mak la'o hela”, dehan nia.
Aleinde ne'e, komandante ne’e husu ba komunidade sira, bainhira haree hetan membru PNTL balun mak envolve iha kazu ruma, ka halo agresaun fízika hasoru sidadaun ruma, bele hato’o keixa ba investigadór sira hodi prosesa tuir lei no Regulamentu Dixiplinár PNTL nia.
Tanba tuir informasaun membru PNTL mós envolve iha konfrontu Salaun Mahoka nia, maibé komandu munisípiu Dili seidauk simu informasaun ka keixa ruma husi komunidade.
Motivu husi kazu tuda malu ne'e tanba konvidadu sira hemu lanu no iha balun odiu malu ho problema anterior nia ne'ebé liga ho Arte Marsiál. (*)
