"Ami buka tenta dadus koretu ne'e maibé ita agora dadauk ita fó estimasaun ida katak, maizoumenus liuhusi 400 mak sira hasees-an husi sistema”, dehan Diretór Filomeno ba www.tempotimor.com iha nia kna’ar fatin Bekora, sesta (21/01).

Maibé iha tempu pandemia Covid-19 traballadór halai sai husi sistema (ilegál) balun entrega ona ba adidu iha Korea Súl no balun fila ona mai Timor-Leste.

"Sim, traballadór ilegál, la'ós ilegál lae, sira hasees-an husi sistema maibé sira serbisu nafatin iha dentru de Korea ne'e, ne'ebé ita-nia adidu nafatin servisu maka’as hodi servisu hamutuk ho Korea sira liliu Imigrasaun”, afirma nia.

Tanba ida ne'e parte Sekretáriu Estadu Formasaun Profesionál no Empregu (SEFOPE) kontinua husu ba traballadór atu entrega-an.

"Ita fó morál nafatin ba sira para labele sees-an husi sistema, ita bele dehan sira na’in rasik mak tau sira-nia an iha risku, tanba sira sei labele asesu ba asuransi saúde nian, labele asesu asuransi ba tenaga kerja nian tanba ema ne'ebé trata sira ne'e sees tiha karik ita boot sira mate, direitu sira ne'e kuaze ita-boot sira lakon”, esplika nia.

Nune’e Governu Timor-Leste sempre fahe informasaun ba traballadór sira antes aranka ba katak labele hasees-an husi sistema sira.

Traballadór ne'ebé halai sai husi sistema kontinua nafatin serbisu iha Korea Súl maibé sira la serbisu ona iha Kompaña uluk no sira muda fali ba kompaña seluk ne'ebé Governu rasik la hatene. (*)