"Bankada Opozisaun ami simu no hetan informasaun nu’udar keixa ida, mai husi instituisaun Estadu nian, APORTIL.ip, ne’ebé sira fó informsaun ba ami katak, sira funsionáriu 24 iha ne'ebá, hothotu hetan ameasa husi membru Governu nomós Prezidente ka Diretór APORTIL ninian, atu transfere hotu kedas sira, tanba sira la kumpre orden ka despaisu ne'ebé mak señor Ministru hatuun ba APORTIL atu prosesa pagamentu ba Ró Transhiip II”, dehan Vise Xefe Bankada CNRT, Patrocino Fernandes, iha plenária PN, tersa (18/01).
Parte funsionáriu sira mós klarifika, razaun lakohi kumpre despaisu husi MTK, tanba laiha baze legál ne’ebé mak bele asegura funsionáriu sira atubele prosesa pagamentu ida ne'e.
"No to'o ikus sira hetan presaun no ameasa husi Ministru refere, ameasa atu obrigatóriumente tenke transfere sira ba ministériu ne'ebé la tuir lei APORTIL ninian rasik”, afirma nia.
Bankada CNRT haree katak situasaun ne'e grave, tanba ministru ida uza kompetensia hodi ameasa no obriga funsionáriu atu selu Ró Tranship II ne’ebé mak oras ne'e iha hela prosesu investigasaun.
Dadauk kazu refere hetan ona asisténsia no akompaña husi Komisaun Anti Korrupsaun (KAK) maibé hein katak Ministériu Públiku ho KAK bele akompaña didi'ak ida ne'e, no ninia andamentu ne'e tenke la'o ba oin.
"Tanba halo tán ameasa katak bainhira funsionáriu sira ne'e la prosesa pagamentu ba Ró Transhiip II ne’ebé mak rejista hela ona iha kazu tama iha investigasaun ne'e, mak Ministru sei haruka instituisaun ne'e hanesan polísia atu ba kaptura sira”, esplika nia.
Ba situasuan ne’e, Deputadu CNRT hato'o parabéns ba funsionáriu sira iha APORTIL ninian, ne’ebé mak brani duni atu hasoru presaun ida ne'e.
"Ne'e duni ita hein katak sira ne'e sai ezemplu ba mákina Estadu tomak entaun ita sei bele salva riku soin Estadu nian ne'e ho di'ak”, hatete nia. (*)