"Prosesu ne'ebé mak haruka ona mai iha Parlamentu Nasionál, prosesu sira ne’e sei tama iha kalendáriu Parlamentu Nasionál", dehan Ministru Prezidensia Konsellu Ministru (MPKM), Fidelis Leite Magalães, hafoin hasoru malu ho Prezidente Parlamentu Nasionál, Aniceto Longuinos Guterres Lopes, iha PN, kinta (13/01).
Tanba lei Pensaun Vitalisia, inklui mós konvesaun balun ne’ebé la konsege halo iha tinan 2021, tanba Orsamentu Jerál Estadu tama iha PN.
Ho ida ne'e, inisativa sira ne’ebé mak pendente hela, parte Governu hato'o filafali ona ba Parlamentu Nasionál atubele hahú filafali sai hanesan prioridade iha tinan 2022.
"Agora iha inisiativa balun ne'ebé mak seidauk halo, maibé sai ona prioridade ba semana dahuluk purzemplu mak konvesaun sira kona-ba Konvensaun Internasionál ba Prevensaun Poluisaun Navios (MARPOL) ida tan naran Solas, kona-ba tasi nia, transporte komunikasaun nian nomós ba MNEK ho defeza”, afirma nia.
Maske nune’e buat balun ne’ebé pendente iha tinan 2021, prosesu hotu sei hala'o, ho esforsu foun liliu Parlamentu Nasionál, bele iha inisiativa atubele hatama iha kalendáriu hodi hahú hala'o nia prosedimentu sira.
"Hanesan mós lei funsaun públika, mai iha parlamentu e parlamentu mak prevé iha planu atubele hahú audénsia no hahú ninia prosesu sira iha fevereiru”, hatete nia.
Ba kestaun ne'e, Prezidente Komisaun A Trata asuntu Justisa no Konstituisionál, Joaquim dos Santos deklara, kona-ba proposta rejime remuneratóriu ba orgaun tirular sira, dadauk sei pendente hela tanba komisaun A sei prioritiza uluk lei sira ne’ebé konsidera hanesan prioridade bazeia ba despaisu husi meza PN. (*)