Maske akordu ne’e, hetan ona klarifikasaun husi Ministru Fidelis Leite Magalhães, maibé Deputada Bankada CNRT, Vergína Ana Belo, konsidera akordu Governu ba investimentu no arendamentu ho kompaña Pelican Paradise la vale. 

"Sé situasaun ne'e mak akontese hanesan ne'e ha'u bele hatete katak asinatura saida mak vise ministru justisa halo ne'e, nia laiha efeitu jurídiku, ne'e (núlu)”, dehan Deputada Vergína Ana Belo iha plenária Parlamentu Nasionál (PN), segunda (10/1).

Bankda CNRT sente hakfodak oituan tanba Vise Ministru Justisa (MJ), José Edmundo Caetano konjuga de'it ba Ministru Justisa (MJ) Manuel Carcéres, siknifika asintura sira ne’ebé vise ministru halo prezisa iha delegasaun ruma husi Ministru.

"Tanba nia tenke hetan delegasaun kompeténsia ne'e husi Ministru, tuir orgánika ministériu nian. Desizaun Konsellu Ministru ne'e atende rezolusaun ida, nia labele boot liu lei, entaun saida mak akontese ne'e nulu”, esplika nia.

Deputada CNRT ne'e, lahatene sa toman ida mak mosu iha governasaun ida ne'e, tanba uluk mós akontese situasaun ida ne'e iha Parlamentu Nasionál iha madantu eis-Prezidente Parlamentu Nasionál (PN), Arão Noe Amaral nia tempu.

Maske iha momentu ne'eba, Prezidente Parlamentu Nasionál, la delega kompeténsia ba Vise Prezidente PN, Maria Angelina Saramento Lopes maibé nia deside halo konvoka plenária, hodi hadau poder husi Deputadu Arão Noe.

"Ha’u kestiona situasaun ida ne'e, karik ita toman tiha ona ho buat sira hanesan ne'e favór ida haree para e depois labele hamosu polémika iha públiku”, hatete nia.

Ba kestaun ne’e, Ministru Prezidensia Konsellu Ministru (MPKM), Fidelis Leite Magalhães, defende akordu Governu ba investimentu no arendamentu ho kompaña Pelican Paradise laiha konflitu interese iha Ministériu Justisa nia laran, tanba akordu refere konsidera legal.

"Ami la konsidera ida-ne’e hanesan konflitu ida tanba akordu ne’ebé mak vise ministru asina ne’e, kompletamente legál. Tuir orgánika ne’ebé asinadu, kompletamente legál”, dehan Ministru Fidelis iha Kuartel Jeneral, Fatuhada, segunda (10/01).

Mezmu Ministru Justisa, Manuel Cárceres da Costa deklara, nia laiha koñesimentu kona-ba akordu arrendamentu rai ba investimentu Pelican Paradise ne’ebé asina hosi Vise Ministru Justisa, José Edmundo Caetano.

Maibé la siknifika iha konflitu interese iha Governu nia laran. Tanba desizaun ba asinatura ida ne’e mai husi reuniaun iha Konsellu Ministru hanesan órgaun másimu Governu nian.

“Orientasaun ne'e mai husi Konsellu Ministru tanba ne'e Vise Ministru asina. Bainhira Konsellu Ministru dehan asina, vise ministru asina. Agora, sé mak asina ne’e. Ne’e kestaun seluk ida. Maibé aktu ne’ebé mak halo em-nome do ministru da justisa, ne’e desizaun ne’ebé mak halo husi Konsellu Ministru”, esplika Fidelis.

Tanba antes ne’e, Konsellu Ministru mós orienta katak, tenke iha lalais konkluzaun, solusaun ba asuntu asinatura entre Governu ho empreza kona-ba akordu investimentu Pelican Paradise.

“Ita-boot sira lembra katak, la sala iha loron 17 ka dia hira ida atu asina, depois kansela tiha, adia tiha, depois la asina. Depois saida mak Konsellu Ministru dehan katak, tenke asina lalais. O que sertu mak asina, no asinatura monu iha dia 03 janeiru, no antes asinatura ne’e hahú, iha ona reuniaun konsellu ministru semana ida antes, ne’ebé mak dehan, tenke avansa lalais. Saida ma feitu, feitu ona”, esklarese nia:

Entretantu Ministru Fidelis mós lakohi fó komentáriu ba deklarasaun ne’ebé antes ne’e Ministru Justisa, Manuel Cárceres, fó sai, maibé nia kompromete katak, iha tempu besik, sei fó solusaun ba Primeiru Ministru (PM), Taur Matan Ruak. Tanba ninia kna’ar mak atu fó garantia ba desizaun hothotu husi Konsellu Ministru tuir lei.

“Ha’u la komenta ida ne’e, ha’u hatene, hanesan ministru do prezidénsia do konsellu ministru, iha kna’ar ida de’it, mak garante ezekusaun hothotu ho loloos, ba desizaun hotu ne’ebé mak Konsellu Ministru halo konforme lei”, afirma nia.

Antes ne’e, Akademista husi Universidade Nasionál Timor Lorosa'e (UNTL), Camilio Ximenes Almeida deskonfia, MInistru Justisa (MJ), Manuel Cárceres iha konflitu interes ba akordu investimentu no arendamentu ho Pelican Paradise Group limited.

"Horisehik ha'u rona señor ministru justisa rasik la aseita. Ne'e ha'u atu konsidera dehan saida, konflitu de intrese entre governante sira, liliu iha intermus de koligasaun ne'e nia laran. ha'u deskonfia parese ke fahe pursentu balun ne'ebé mak la hanesan, tanba ne'e mak iha parte ida ita asina tiha, iha parte seluk reklama fali katak nia la aseita”, dehan nia iha kna’ar fatin Kaikoli, kinta (06/01).

Nune’e, Ministru Justisa (MJ), Manuel Carceres hatete, nia parte hakfodak Governu Timor-Leste asina ona akordu investimentu no arendamentu ho Empreza Pelican Paradise group limited, tanba nia parte Ministru Justisain la konkorda iha kontratu arendamentu tuir dekretu Lei 19/2004 Ministériu Justisa nian.

“Ha'u mós hakfodak fali, ha'u hakfodak tanba mídia nasionál sira la ba halo liputan depois ha'u mós la ba ida sua eselénsia Primeiru Ministru mós la ba ne'ebé ba husu sira ne'ebé asina de'it ha'u labele fó resposta tanba Ministru la asina, ha'u la konkorda ho saida mak hakerek iha kontratu de arendamentu, ne'ebé iha parte barak”, dehan Manuel Carceres ba Jornalista sira iha Palásiu Governu, kuarta (05/01). (*)