Print this page

PN Aprova Proposta Lei Enkuadramentu OJE

Ministru Finansa, Rui Augusto Gomes. Ministru Finansa, Rui Augusto Gomes. Foto Suplay

Tempotimor (Dili)-Parlamentu Nasionál (PN) deside aprova ona Proposta Lei númeru 27/V/3ª kona-ba Enkuadramentu Orsamentu Jerál Estadu (OJE) iha finál global.

Proposta Lei foun n.º 27/V/3ª-Enkuadramentu Orsamentu Jerál Estadu no Jestaun Finanseira Públika, ho 37 votu A favor, 2 Abstensaun no laiha Kontra.

Hafoin hala'o aprovasaun, Ministru Finansa, Rui Augusto Gomes hatete, ho proposta lei ne’ebé hetan ona aprovasaun, ne'e hatudu katak Timor-Leste konsege reforma ona jestaun finanseira públika nomós estabelese rejime jurídiku ida ne'ebé mak bele rezolve defisiénsia oioin iha rejime orsamentál anuál.

"Iha Lei ne'e rasik ita sei hetan defisiénsia kona-ba konseitu perimetru orsamentál no sei reduz rejidez iha enkuadramentu orsamentál”, dehan Ministru Rui liuhusi nia intervensaun iha plenária PN, segunda (10/01).

Tanba husi proposta Lei Enkuadramentu Orsamentál ne’e, sei substitui Lei Orsamentu Jestaun Finanseira (LOJF) atuál ne'ebé iha ona vijénsia liu dékada ida nia laran. Alterasaun hirak ne'e importante no urjente atu hatán ba limitasaun sira iha LOJF atuál. 

Ho ida ne'e, Diploma foun ida-ne’e sei revoga Lei n.º 13/2009, (LOJF), 21 Outubru, no espera Prezidente Repúblika bele Promulga Lei Enkuadramentu Orsamentál, mak Governu sei prepara Diploma neen (6) atu implementa Lei ne’e rasik.  

Purtantu Proposta Lei Enkuadramentu Orsamentu Jerál Estadu no Jestaun Finanseira Públika hetan aprovasaun iha Jeneralidade iha 6 Jullu tinan 2021, no tuir kedas ho Diskusaun Espesialidade no aprovasaun ba Artigu sira hamutuk 125 iha 13 Agostu 2021. 

Enkuantu tuir informasaun adisionál balun ne’ebé www.tempotimor.com asesu katak, Lei Enkuadramentu Orsamentál hanesan rezultadu ida husi prosesu naruk Reforma Jestaun Finanseira Públikas ne’ebé mak inisia ona desde tinan 2015 husi V Governu Konstitusionál no Governu anteriór sira halo ona melloramentu lubun ida liuhusi diskusaun iha tinan barak nia laran.

Lei ne’e introduz prinsípiu orsamentál 11 mak hanesan Unidade no Universalidade, Anualidade no Plurianualidade, Estabilidade no Sustentabilidade Orsamentál, Ekonomia, Efisiénsia no Efikásia Transparénsia, Responsabilidade, Ekuidade Interjerasionál, Orsamentasaun pur programas, Espesifikasaun, Naun-Kompensasaun no ikus-liu mak Naun-Konsignasaun. 

Liuhusi Lei ne’e, Governu propoin atu halo mós alterasaun substansiál iha aspeitu balun ne’ebé esensiál tebes ba Enkuadramentu Orsamentu no Jestaun Finanseira Públikas ho objetivu ida mak atu hametin liután relasaun entre planeamentu no orsamentu liuhosi orsamentasaun pur programas ne’ebé foku ba rezultadus.

Desde tinan 2015, V Governu Konstitusionál halo ona servisu advokasia kona-ba Reforma Fiskál no Jestaun Finansas Públikas liuhusi implementasaun fazeadamente orsamentasaun pur programas, eliminasaun prátika desorsamentasaun, hasa’e autonomia servisus no melloramentu transparénsia iha ezekusaun orsamentu. 

Iha tinan 2019, Governu daualu Konstitusionál kontinua elabora Proposta LEO no submete mai PN iha Janeiru 2021.

Durante prosesu preparasaun, elaborasaun no diskusaun Proposta LEO, Governu no Parlamentu Nasionál mós halo ona konsultasaun lubun ida ho setór ekonómiku no setór sosiál sira mak hanesan Banku Sentrál Timor-Leste, RAEOA, Institutu Nasionál Seguransa Sosiál, Câmara de Contas, Konsellu Konsultivu Fundu Petrolíferu, FONGTIL, La’o Hamutuk no Fundu Monetáriu Internasionál.

Aleinde Proposta LEO ne’e rasik inklui ona rekomendasaun balun ne’ebé mak hato’o husi setór ekonómiku no setór sosiál no kumpre mos boa prátika internasionál ne’ebé mak rekomenda husi Relatóriu Ekipa Misaun Artigu IV, Fundu Monetáriu Internasionál no Relatóriu Revizaun ba Despeza Públiku no Akuntabilidade Finanseira husi Banku Mundiál. (*)

Rate this item
(0 votes)
Last modified on Monday, 10 January 2022 20:54
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

Related items