"Horisehik ha'u rona señor ministru justisa rasik la aseita. Ne'e ha'u atu konsidera dehan saida, konflitu de intrese entre governante sira, liliu iha intermus de koligasaun ne'e nia laran. ha'u deskonfia parese ke fahe pursentu balun ne'ebé mak la hanesan, tanba ne'e mak iha parte ida ita asina tiha, iha parte seluk reklama fali katak nia la aseita”, dehan nia iha kna’ar fatin Kaikoli, kinta (06/01).
Dadauk ne'e, Governu Timor-Leste liuhusi Vise Ministru Justisa (MJ), Jose Edmundo Caetano, konkorda ona no asina akordu ho empreza Pelican Paradise hodi investe otel fitun 5 iha área Tasitolu nian.
Maibé iha situasaun ne'e bele dehan mosu konflitu interese ba malu entre membru Governu sira, ne'ebé mak subar hela iha kontratu refere.
Tanba akordu refere Vise Ministru Justisa reprezenta Governu no asina akordu ho empreza maibé Ministru Justisa, Manuel Carcèrese deklara katak nia parte la konkorda akordu refere.
Ba situasaun ne'e, nu’udar akademista sente admira oituan, no konsidera akordu ne'ebé Governu kria ho Pelican Paradise ne'e laiha baze fundamentu, tanba ministru ida halo kontratu maibé la hetan aseita.
"Parese ke fahe pursentu balun mak la hanesan karik", hatete nia.
Tuir loloos problema ida ne'e, membru Governu sira la presiza reklama iha fatin públiku tanba ida ne'e problema internál, tanba reklamasaun ne’e sei mosu interpretasaun membru Governu iha konflitu de interese ba kontratu.
Nune’e, Ministru Justisa (MJ), Manuel Carceres hatete, nia parte hakfodak Governu Timor-Leste asina ona akordu investimentu no arendamentu ho Empreza Pelican Paradise group limited, tanba nia parte Ministru Justisain la konkorda iha kontratu arendamentu tuir dekretu Lei 19/2004 Ministériu Justisa nian.
“Ha'u mós hakfodak fali, ha'u hakfodak tanba mídia nasionál sira la ba halo liputan depois ha'u mós la ba ida sua eselénsia Primeiru Ministru mós la ba ne'ebé, ba husu sira ne'ebé asina de'it ha'u labele fó resposta tanba Ministru la asina, ha'u la konkorda ho saida mak hakerek iha kontratu de arendamentu, ne'ebé iha parte barak”, dehan Carceres ba Jornalista sira iha Palásiu Governu, kuarta (05/01). (*)
