"Iha lei rua mak prezidente veta, e ami hein hela despaisu husi Prezidente PN atu ajenda ba bainhira mak ita haree", informa Prezidente Komisaun A PN, Joaquim dos Santos "Boraluli", iha PN, kuarta (05/01).

Husi lei rua ne'e Prezidente Repúblika deside veta politika, la'ós veta tanba artigu ruma mak inkonstituisionál.

Maibé atu rezolve ida ne'e, depende ba Prezidente Parlamentu Nasional (PN), Aniceto Longuinhos Guteres Lopes, atu halo despaisu oinsá mak kria ajenda iha tempu badak hodi rezolve.

"Ida seluk mós kona-ba majistradu judisiáriu ninia estatutu, ne'e mós Prezidente veta polítika, no la'ós por inkonstituisionalidade, depois ita haree, hein prezidente parlamentu nia despaisu atu bainhira mak ita rezolve haruka filafali ba prezidente repúblika, kona-ba lei sira no sira ne'ebé pendente ne'e", esplika nia.

Dadauk ne’e, komisaun A hein hela despaisu husi meza kona-ba anti projetu-lei organizasaun investigasaun kriminál, atu rezolve problema funsionamentu no meritu entre Polisia Siéntifiku Investigasaun Kriminal (PSIK) ho Servisu Investigasaun Kriminál (SIK) atubele aprezenta ba meza PN.

"Ida ne'e ita lahatene bainhira mak Prezidente Parlamentu baixa ba komisaun sira atu diskute iha antesidensia", hatete nia.

Aleinde ida seluk mak anti projetu kona-ba rádiu disfuzaun, dadauk komisaun prepara atu hatama ba meza parlamentu, maibé hein de'it bainhira mak prezidente PN hasai despaisu.

"Rádiu disfuzaun, ita hanoin atu rezolve problema tékniku balun iha ne'eba, liliu liga ho kompetensia balun autoridade nian, liga mós ho kompeténsia rádiu televizaun Estadu ne'e nia autoridade, purtantu ita hein prezidente baixa mak ita ajenda ba diskusaun", esplika nia. (*)