“Hakarak ka lakohi tinan oin (2022) mai, ha’u hakarak labarik sira ne'ebé ho idade minoriedade labele tan fa’an sasán iha dalan ninin, ida ne'e ita tenke asegura, tanba labarik sira ne’e nia fatin iha eskola no uma tanba labarik ho idade 17 ba kraik ne'e  inan ho aman mak tenke hola responsabilidade, ho ida ne'e ha'u tenke realiza iha tinan oin”, dehan Guilermina, iha Kaikoli, tersa (21/12).

 Atividade negósiu fa’an sasán ida ne’e inan aman mak tenke responsável, maske iha família ne’ebé mak kbi’it la’ek mós responsabilidade ne’e iha inan ho aman, labele fó todan ba oan sira, tanba oan sira-nia tempu seidauk to’o atu fa’an sasán.

“Tinan oin mai ne'e, ha’u lakohi haree tan labarik sira atu servisu fa’an sasán iha dalan ninin saida de’it, tanba ita haree labarik sira mak iha fali responsabilidade ba família ida ne’e ha’u la aseita”, deklara nia.

Antes ne’e mós Diretora Ezekutiva Programa Monitorizasaun Sistema Judisial, Ana Paula Marçal hatete, iha ezbosu projetu-lei ne'ebé Komisaun F introdúz iha matéria foun no mudansa balun ne'ebé JSMP propoin hanesan títulu alternativa, definisaun ba labarik, adolexente, joven, matéria ne'ebé sei falta no proposta alternativa.

“Atubele reflete ho di’ak norma sira ne’ebé konsagra iha Konstituisaun RDTL no Konvensaun Internasionál Direitu Labarik, inklui konteúdu husi lei ne’e rasik bele avansa ho títulu ida hanesan “Rejime Jurídiku kona-ba Direitu, Liberdade no Protesaun Labarik no Adolexente”, esplika nia.

Bainhira temi de'it protesaun, interpretasaun ne'e halai liu aspetu negativu ka halai liuba aspetu labarik sira ne’ebé tama ona iha kategória risku laran, presiza hetan protesaun.

“Intensaun husi lei ida ne'e la’ós de'it haree ba aspetu ida de’it, maibé aspetu hothotu ne’ebé relasiona ho direitu, liberdade no garantia fundamentál sira labarik sira-nian, inklui direitu ba protesaun ba labarik sira iha risku ba violasaun sira-nia direitu, liberdade no garantia fundamentál sira”, informa nia. (*)