Tanba ne’e, Prezidente Repúblika (PR), Francisco Guterres ‘Lú Olo’, dekreta hodi fó Prémiu Direitu Umanu “Sergio Vieira Mello” edisaun-14 ba makmanán na’in-haat.
Makmanán na’in-haat durante ne’e hatudu ona sira-nia dedikasaun hodi promove, defende no divulga direitu umanu iha Timor-Leste.
Liuhusi Dekretu Prezidente Repúblika númeru 108/2021, 9 dezembru, Xefe Estadu fó Prémiu Direitus Umanus “Sergio Vieira de Mello” ba manan-na’in ho kategória Direitu Sosiál, Ekonómiku no Kulturál ba indivídu, Alexandre Rosa Bruno Sarmento no Paulina da Costa Soares, no ba organizasaun, Orfanatu Dominicana no Casa Vida, Centro de Cuidado às Crianças.
Anualmente, Prezidente Repúblika loke oportunidade ba sidadaun timoroan no estranjeiru husi organizasaun governamentál no la’ós governamentál atu hatama sira-nia kandidatura ba Prémiu Direitu Umanu “Sergio Vieira de Mello” tuir kritériu sira ne’ebé estabelese.
Hafoin Conselho de Agraciamentos e Ordens Honoríficas halo análize, apresiasaun no vizita ba fatin implementasaun atividade husi kandidatu sira, orgaun konsultiva ne’e sei hato’o ba Prezidente Repúblika atu deside manán-na’in ba Prémiu.
Prémiu Direitu Umanu “Sergio Vieira de Mello” hari’i ho Dekretu-Lei númeru 15/2009, 18 marsu, atu rekoñese no destaka atividade sidadaun timoroan no estranjeiru, husi organizasaun governamentál no la’ós governamentál, ba promosaun, defeza no divulgasaun Direitu Umanu iha Timor-Leste.
Prémiu Direitu Umanu “Sergio Vieira de Mello” fahe ba kategória Direitu Sosiál, Ekonómikus no Kulturál no kategória Direitu Sivís no Polítiku. (*)