Tuir kronolojia ne’ebé haktuir husi vítima ho inisiál MA, katak iha loron 1 fulan-dezembru ne’e, MA halo viajen hela ho motorizada. 

Derrepente, suspeitu GM bolu tuir vítima hodi aprezenta-an, katak nia membru Polísia no halo ameasa kedas ba vítima no hadau vítima nia sasán balu.   

Nune'e Vítima hola inisiativa ba hato'o keixa iha PCIC, no PCIC elabora kedas investigasaun no identifikasaun to’o ikus hetan duni suspeitu no halo detensaun ba suspeitu iha loron 02 fulan-dezembru, foin lalais ne’e, iha área Tasitolu nia 

"Aktu suspeitu nian ne’e komete krime roubu (krime na’ok) no uzurpasaun ba funsaun. Tanba ne’e, PCIC detein hela iha sala detensaun PCIC nian hodi submete ba investigasaun”, deklara Portavóz PCIC, Octavio da Costa Araújo, iha sala auditóriu PCIC, segunda (07/12).

Objetu ba krime sira hanesan motorizada ne’ebé mak suspeitu uza hodi halo nia asaun, osan ho montante US$1,000.00-resin, inklui telemóvel ne’ebé pertense ba vítima nian. Tempu ne’ebá, PCIC halo kedas flagrante de lito ba suspeitu.

“Ho objetu krime iha hela vítima nia liman, entaun, ami halo kedas detensaun flagrante de lito ba suspeitu no daudaun ne’e suspeitu detein hela iha sala detensaun durante oras 72 nia-laran hodi komunikadu ho prokuradór no submete ba primeiru interrogatóriu judisiál”, dehan nia.

Tuir denunsia husi vítima dehan katak, momentu suspeitu halo ameasa ba vítima deskonfia utiliza hela ko-armas (kilat/pistola), maibé bainhira PCIC sira halo kapturasaun, la deteta arma ruma iha suspeitu nia liman. (*)