"Esperitu ba arte sei la mate, maske hasai fatin ne'e mamuk ona, mais ami-nia espiritu la mate, iha futuru oin, ami sei iha muda buat balun sei iha, ami koko sei halo iha fatin kloot mós laiha buat ida, naran fó mahon ida mai para ami halo espasu ba pinta nian", dehan Membru Asosiasaun Arte Moris, Joni Cabral (41) nu'udar pintor, ho oin triste ba www.tempotimor.com iha fatin Arte Moris, Komoro, kinta (02/12).

Iha Asosiasaun Arte Moris durante tinan sanulu-resin-ualu, hodi aprende buat foun ida husi fatin ne'e, mai buat foun ida mamuk liu, maibé to'o fatin ida ne'e mak halo nia sai hatene nia talentu pinta.

"Iha ne'e, iha opsaun pinta, musik, teatru, poeta no multimedia, ida ne'e mak sai sasin ida mai ami hodi aprende buat ne'ebé tuir ami-nia talentu", esplika nia.

Nune'e, Joni Cabral espesialidade liu kona-ba pinta nian, ne'ebé tau iha edifísiu Arte Moris no agora obra balun soe hela iha estrada ibun husi parte Governu sira.

"Iha parte Arte Moris mós kontribui ba rai ida ne'e, liuhusi obra ne'ebé dalaruma kolobora ho Governu, pinta hanesan ezemplu agora sira soe dadauk obra balun ne'ebé hanesan Veteranu sira-nian, ne'ebé sira la respeitu sira soe, iha obra baraj ne'ebé kuaze espalla tiha ona iha mundu balun tuir espesaun iha Austrália, Swis no Asean", hatutan nia.

Maibé sira triste wainhira Governu mai atu foti fatin ne'e, no la respeitu sira-nia obra ne'ebé sira soe iha estrada ne'ebá.

"Sente triste, la'ós ami de'it, kuaze ema ne'ebé simpatia ba Arte Moris ema triste hotu wainhira soe obra sira ne'e", dehan nia.

Sira koko hakarak atu kolobora maibé Governu to'o agora laiha kolobora, sira-nia kolobora mak tenke hasai sira husi Arte Moris, hodi la kria fatin dignu ida ba sira atu halo sira-nia servisu.

"Benefísiu husi Arte Moris ne'ebé halo ha'u kontente hahú husi obra ne'ebé ami pinta, ami la espera katak ida ne'e hanesan hamenus dezemprugu iha ne'e, ne'ebé kria talentu mai ami, taun liuhusi obra hetan netik osan oituan ida hodi sustenta ami-nia nesesidade", reafirma nia.

Presu ba obra ne'ebé sira fa’an depende ba valór husi dezeñu, dalaruma sira hanoin di'ak, nia presu bele karreta ida nia folin, motorizada ida nia folin.

Enkuantu membru ne'ebé hamahon-an iha uma mahon asosiasaun Arte Moris, hamutuk ema na'in-60 ne'ebé kompostu husi devizaun teatru, pinta, musik no multimedia. (*)