Tanba ne’e, oan-kiak husu ba Prezidente Repúblika (PR), Francisco Guterres 'Lú Olo' apoiu edukasaun ba oankiak sira bele asesu universidade.

"Ha'u husu ba na’i Prezidente, karik bele fó apoiu netik ami oan-kiak sira ou ami-nia oan sira iha área edukasaun, atu nune'e sira mós bele asesu ba edukasaun, nune'e sira mós bele asesu ba universidade, tanba ami asiste iha televizaun ou mídia ne'ebá, deputadu sira servisu durante tinan 5 de'it, maibé sira para tiha sei iha nafatin saláriu ida bolu dehan katak, pensaun vitalisia", dehan Francisca iha diálogu ho PR Lú Olo iha Sentru Konvensaun Baukau, sesta (26/11).

Tanbasá, matebian sira fakar raan tanba Timor-Leste ida ne'e, oan-kiak sira ba Governu dehan lei la fó dalan, lei ne'e se mak halo, la'ós Governu mak halo?.

"Ida ne'e ami la simu, sira servisu tinan 5 para tiha ita-boot sira sei hanoin nafatin sira, be ami mak terus na’in, ami-nia apa mate husik hela ami hanesan ne'e,  ami-nia inan faluk,  ida ne'e ita-boot sira la rekoñese, oinsá Timor atu la'o ba oin, se matebian erói sira ita-boot sira haluha tiha, ida ne'e mak ami husu ba na’i Prezidente, tetu netik ba, rona netik oan-kiak sira-nia halerik", afirma nia.

Hatan ba preokupasaun ne'e, Prezidente Repúblika, Francisco Guterres 'Lú Olo' hatete, labarik sira iha direitu atu eskola, los duni, dekretu lei ida Governu nian hasai ona dehan katak labarik sira veteranu nia-oan, iha direitu atubele hetan bolsa estudu, husi hanorin bázika nian to'o universidade, bele ba to'o iha rai sira seluk. 

"Foin dadaun iha fulan kotuk, Governu halo alterasaun ba lei ne'e duni, hodi hadi’a di'ak liután lei ne'e, hodi bele fó protesaun ba labarik sira, ita-nia oan sira, veteranu nia ona sira, atu ba eskola", deklara Xefe Estadu.

Maibé labarik sira ba eskola ne'e, vetarnu nia-oan hotu ka?. keta la'ós veteranu nia oan mak ba halo fali, tenke tau matan tutuir. (*)