"Ha'u dehan kedas prosesu diskusaun mak ne'e, ida ne'ebe prioridade ita halo uluk, ne’ebé labele fó fali todan ba malu mak ne'e. Ne'e prosesu normal, la'ós pedidu urjénsia, se pedidu urjénsia dala-ruma ami rezolve hotu ona”, dehan Prezidente Komisaun A, Joaquim dos Santos, iha PN, sesta (26/11).

Dadauk, Lei Pensaun Vitalísia ne'e komisaun submete ona ba prosesu diskusaun no ida ne'e ko'alia bebeik ona katak, diskusaun ne'e sei prosesu hela, no seidauk bele deskute tanba lei sira ne’ebé hatun ba meza komisaun, mesak urjénsia.

"Tanba sira uluk tun mai la husu urjénsia ida, ne’ebé pedidu ida urjénsia ne'e balun semana ida, semana rua, ne’ebé ita fó uluk prioridade ba ida semana ida, semana rua ninian ne'e”, hatete nia.

Kona-ba lei sira ne'ebé mak ninia prosesu normal ne'e la'ós dehan la diskute, maibé tanba komisaun sei tau prioridade hela ba lei sira ne’ebé ho karater urjénsia.

Tanba ne'e, komisaun aprova deside sei diskute lei sira ne’ebé urjénte no prioridade hotu tiha mak foin bele diskute filafali lei sira ne’ebé nia prosesu ne'e normal.

"Sira ne’ebé prosesu normal ne'e la'ós dehan ita la halo ona, eh kansela lai ninia prosesu, mais derepente Governu mai tan ida dehan ne'e urjente entaun sira seluk dudu ba neneik, ne’ebé orsida todan ne'e mai fali Komisaun”, afirma nia.

Dadauk Lei sira ne’ebé komisaun A sei diskute mak hanesan, lei Orgaun Advogadu, Rejime Jurídiku Asosiasaun Públika, defensór públiku, Formasaun ba Majistradu, Komisaun Funsaun Públika, no ikus mak Pensaun Vitalísia.

Maibé ko’alia kona-ba lei pensaun vitalisia dalaruma mídia sira mak uza sala termu, tanba agora lei pensaun vitalísia laiha ona, no iha mak Rejime Remuneratóriu ba Orgaun Tutular sira.

"Ne’ebé ida foin dadauk sira husu ne'e atu muda de'it, halo lei ida muda fali ba rejime, seguransa Sosiál atu halakon tiha lei ida agora ne'e”, esplika ni.

Dadauk sei problema hela tanba halo lei ida hodi halakon lei ida ne'e presiza iha balansu kona-ba regra atribuisaun ba diretu, atu nune'e komisaun foti desizaun karik labele sala. (*)