"Maibé buat ida ne'ebé ita kontra iha mak, ita dehan ita-nia orgaun soberanu haat laiha morál, Parlamentu laiha Morál, Governu Primeiru Ministru no Ministru sira laiha morál, Prezidente Repúblika (PR) laiha morál no tribunál rekursu laiha morál se bainhira sira mós hakarak simu hotu bonus, injustisa iha ne'e”, dehan Daniel do Carmo ba Jornalista iha Salaun Luz Clarita, sesta (26/11).

Daniel konsidera injustisa tanba sira-nia saláriu ne'e boot, no simu tan bonus iha tempu natál nian iha tinan ida nian laran.

"Injustisa tanba sira-nia saláriu ne'e boot, sira kada fulan simu rihun US$3 ba leten iha rai ida  ne'e kategória dehan boot, seráke ida ne'e seidauk to'o? Entaun sira problema iha morál”, afirma nia.

Maibé ba funsionáriu Públiku Governu konsidera sira hanesan traballadór, nune'e tuir kódigu laborál sira merese hodi simu saláriu adisionál ka saláriu 13.

"Tuir kódigu laborál Timor-Leste hatete tenke hetan sira-nia pagamentu antes dia 20 de Dezembru ne'e ba funsionáriu sira”, hatete nia.

Maibé membru Governu sira kria rasik sira no dekretu ida hodi uza ba sira-nia interese siknifika katak, entermus Sosiedade Sivíl sira halo pergunta ba membru Governu sira-nia morál iha área polítika poupansa.

"La Merese deputadu, Ministru,  sira ida simu bonus iha natál, tanba sira dedikadu komprimissu ida fó ba sira hodi serve, mais la'ós halo dekretu lei atu asegura sira-nia an”, dehan nia.

Maibé pior liu tan Asessor ida ne'ebé mak simu saláriu boot, nune'e mós ho funsionáriu Apointment Polítiku sira ne'e mós hetan hotu bonus.

Temi injustisa iha saláriu 13 ba Membru Governu sira ne'e mosu iha ne'e sira ne'ebé saláriu boot mak hetan bonus, maibé funsionáriu Públiku sira iha direitu atu hetan bonus tuir kódgu laborál Timor-Leste nian.

Nune'e mós iha Konsellu Ministru (KM) lideradu husi Primeiru Ministru (PM), Taur Matan Ruak, deside aprova dekretu lei ba Funsionáriu Públika no ajente Administrasaun hodi simu saláriu adisionál (saláriu 13) iha tempu natál tinan 2021 ida ne'e. (*)