"Ohin mai ita orienta ba sira para oinsá mak atu rezolve sira-nia problema tuir dalan no tuir kanal justisa ne’ebé iha”, dehan nia iha Parlamentu Nasionál, segunda (22/11).

Tanba orientasaun ne’ebé fó ba komunidade ne'e nu’udar obrigasaun Bankada CNRT oinsá mak orienta povu sira wainhira sira hasoru problema kona-ba justisa ninian.

Bankada CNRT haree katak, kazu ba disputa rai entre komunidade ho na'in ba kompaña Miramar Blok António Lobato ne’ebé akontese desde 2013, tenke iha advogadu ruma ka bele lori keixa ba parte justisa.

"Deputadu sira ne'e, reprezentante povu nian, ne’ebé povu ida ne'ebe iha ninia problema sira hakarak mai hato'o prontu e sira mós hakarak mai hato'o iha bankada CNRT entaun bankada CNRT simu, para rona sira-nia problema ne'e saida”, afirma nia.

Tanba komunidade sira ne'e, hetan ona termu espesial, auto de restituisaun provizóriu de pose husi Tribunál, siknifika provizoriamente Tribunál rekoiñese komunidade sira ne'e mak hanesan na'in hodi okupa rai depois hein desizaun finál husi Tribunál katak se mak bele na'in ba rai ida ne'e.

Purtantu dokumentu ne'e Tribunál atribui ba sira iha tinan 2014, to'o agora sei nafatin.

Maibé ikus mai mosu problema oituan ho kompaña Miramar Blok, ne’ebé lori polísia ba dudu ho forsa, ne’ebé komunidade nia uma balun tenta atu dudu sai.

"Ne’ebé sira sente katak sira laiha dalan, e sira mós ohin hato'o katak sira tenta ba buka to'o sira-nia advogadu ne’ebé mak tempu liubá kotuk iha 2013-2014 sira lori prosesu ne'e ba Tribunál, maibé advogadu mós la fó solusaun entaun sira haree katak sira laiha dalan, atu halo nusa mak bele hetan justisa”, hatete nia. (*)