Disputa rai ne'e mosu entre kompaña Mira Mar Blok ho Komunidade Aldeia 12 outubru desde tinan 2004 maibé to'o agora laiha solusaun.

Tanba ne'e iha semana kotuk Kompaña Mira Mar blok deside uza Polísia Nasional Timor-Leste (PNTL) ba halo estrundu no tiru gas air-mata inklui mós kompaña ba suru estraga komunidade nia sasán.

Komunidade Maria Asunção do Santos hatete, sira-nia parte deside kontinua hela iha rai ne'e tanba bazeia ba karta husi Tribunál.

"Hanesan sidadaun ami hetan karta provizóriu husi Tribunál katak ami mak iha diretu atu halo buat hotu iha rai leten ne'ebá, maibé tan de'it ami osan laiha, ami la halo buat ida entaun husi kompaña Miramar Blok, ba foti hotu ami-nia fatin sira ne’ebé mak Tribunál entrega mai ami e hodi uza halo rendimentu, e agora dadauk mós nia halo hela konstrusaun ida iha ne'ebá, e foin dadauk loron rua ka tolu liu bá, mós sira lori polísia ba tiru iha ne'eba halo buat hotu, halo gas (air mata) atu sai fali hanesan 1999”, dehan nia iha Parlamentu Nasional, segunda (22/11).

Dadauk komunidade aldeia 12 outubru deside marka audénsia ho deputadu Bankada Opozisaun Congresso Nacionál de Reconstrução de Timór (CNRT) tanba nu’udar timoroan sente triste ho asaun husi kompaña Mira Mar Blok ne’ebé halo ba komunidade hanesan situasaun iha 1999.

"Tanba ne'e mak agora dadaun ami mai to'o iha fatin ida ne'e, hakarak husu Governu atu toma atensaun lalais no husu ba Tribunál atu fó netik solusaun ruma mai ami povu beik sira ne’ebé mak la kompriende lei e la kompriende buat hothotu”, afirma nia.

Husu Governu atu atende lalais kestaun rai ne'e tanba agora dadauk sente hanesan kompaña Mira mar Blok, halo asaun no hanesan fali funu ne’ebé akontese iha 1999.

Purtantu asaun ne'e la'os foin akontese maibé ne'e akontese hahú kedas tinan 2004, 2013, mai to'o agora.

"Deskulpa atu kona-ba (ganti rugi), iha 2013 iha família lubuk ida ne’ebé nia hasai, maibé iha mós família lubuk ida ne’ebé nia hasai husi fatin ida ne'e ba tau fali iha fatin ema seluk nian, agora dadauk ema na’in mós hakarak hasai sira husi fatin ho obrigatóriu”, esplika nia.

Komunidade hirak ne'e hela iha Bairo Santu Antonio Tali Laran, desde tinan 1968 no to'o agora tama ba beioan dalahaat nian mós sira mak nafatin hela iha ne'eba. (*)