Tempotimor (Díli) – Prokuradór Jerál Repúblika (PJR), José da Costa Ximenes deklara katak, kazu Vera Carvalho Martins, sei iha posibilidade hodi halo rekursu.

PJR nia deklarasaun ne'e, hatán ba preokupasaun familia vitima no sosiedade sivíl ne'ebé kestiona kona-ba kapasidade Ministériu Públiku no orgaun judisariu. Tanba to'o agora, familia vitima seidauk simu mate isin.

"Ekipa haree tiha ona rekursu ida ne'e. Ami hanoin iha posibilidade boot para bele rekursu no manan rekursu. Tanba saida mak ha'u dehan hanesan ne'e, tanba ha'u haree hanesan falla boot ida iha tribunal,” afirma PJR, Sesta (06/09/19).

Nia dehan, vitima mate iha loron 2 de Jullu 2018. Loron 12 Setembru mak foin deskobre, depois de fulan ida loron sanulu. “Agora mak tribunál hakarak test DNA. Raan laiha ona. Oinsá mak raan sei eziste. Desizaun ida ne'e la respeita," PJR afirma.

Kona-ba isu ne'ebé hatete, vitima Vera sei moris, PJR dezafia. "Agora ema balun dehan Vera sei moris. Lori took Vera mai ha'u nia oin, ha'u haree to'ok. Ha'u hanoin, tribunál, Ministériu Públiku servisu iha justisa. Ne'e servisu signifika ema nia vida umana mak importante," nia esplika.

Entretantu, vitima Vera Carvalho Martins deskonfia ema oho iha área Cristo Rei, depois lori ba hakoi iha área Subaun, partense Munisípiu Manatutu. Tuir informasaun ne'ebé Tribunál  Munisípiu Díli fo sai, mate isin ne'ebé to'o agora iha hela mortuariu Hospitál Nasionál Guidu Valadares (HNGV) la'ós vitima Vera.

Tribunál Munisipal Díli, iha loron 22 Agostu 2019 deside tiha ona liuhosi juiz koletivu Eusebio Xavier, Ana Paula no Zulmira Auxiladora, absolve tiha kazu ne'e. Tanba, tribunál konsidera arguidu na'in haat inosente ba kazu oho matebian Vera.  Ministériu Públiku akuza Arguidu nain haat mak halakon vitima nia moris.