"Kondekorasaun ho Kolar Ordem Timor-Leste, títulu póstumu ba Dom Basílio do Nascimento nu'udar rekoñesimentu husi Estadu ba ninia serbisu nunka kolen ba afirmasaun identidade Timoroan liuhusi hasa'e valores no prinsípiu moris katóliku iha Timor-Leste," hato'o PR Lú Olo husi nia mensajen, Segunda (01/11).
Xefe estadu ne'e afirma, saudozu Dom Basilio kontribui ba luta libertasaun nasionál liuhusi enkontru sekretais ho lider Frente Armada.
Dom Basílio do Nascimento lidera Igreja iha tempu okupasaun Indonézia nian la'ós buat fásil ho konflitu oioin entre Katólikus sira. Nune'e mós la fásil atu lidera Igreja iha períodu hanesan ohin loron, ne'ebé nakonu ho dezafius modernidade.
"Kondekorasaun ne'e nu'udar símbolu ne'ebé hatudu sentimentu agradesimentu husi Estadu ba espíritu no esforsu ne'ebé labele nega manifesta durante tempu luta no prosesu konstrusaun Estadu hafoin Timor-Leste hetan ninia independénsia" Kata Lú Olo.
Tuir Dekretu-Lei númeru 20/2009, 6 maiu, mak kria Ordem de Timor-Leste, atu hatudu rekoñesimentu Timor-Leste nian ba sidadaun nasionál no estranjeirus, iha sira-nia serbisu kontribui ba benefisiu Timor-Leste, Timoroan ka umanidade.
Igreja Katóliku sempre asume ho dignidade sofrimentu povu tomak ninian, hamriik iha povu nia sorin defende direitus bázikus. Konstituisaun rekoñese papel Igreja nian iha luta libertasaun nasionál no hafoin restaurasaun independénsia.
Estadu Timor-Leste rekoñese no valoriza individu no institusoins, iha rai-laran no tasibalun, inklui membru kleru tanba sira-nia kontribuisaun ba luta libertasaun Povu no iha prosesu dezenvolvimentu.
Entretantu Dom Basílio do Nascimento iis kotu iha 30 outubru 2021, iha Ospital Nasional Guido Valadares ho moras kardiaku, hafoin hetan atakasaun iha Covalima.(*)
