Informasaun ne’ebé www.tempotimor.com asesu iha pájina ofisiál PNTL, iha loron (19/10) katak, aktu omesidiu brutal ne'ebé akontese iha loron 14 Outubru 2021 iha Aldeia Wasufa, Suku Namanei, Postu Administrativu Kelikai hasoru saudozo “Lemorai” ne'ebé mak hanesan mós guerileiru ida ba luta libertasaun da patria.
Iha loron (18/10) família matebian halo Konferénsia Imprensa hodi koondena maka'as hahalok asaun brutal oho veteranu "Lemorai".
"Ami koondena maka’as aktu omesidiu brutal ba veteranu “Lemorai’, ami la simu ema oho ita-nia maluk veteranu hanesan animal tanba veteranu nu’udar patrimóniu sagrada estadu nian, ami hakarak hato’o katak krime ho karakter hanesan nee akontese dalabarak ona iha pasdu hasoru veteranu sira”, dehan Portavoz Família Matebian, Bernardino de Cristo Fereira “Teki Timur", iha Fatuhada, segunda (18/10).
Tanba ne’e husu ba órgaun judisiáriu sira atu halo investigasaun profundu no julgametu própriu hodi aplika pena ne'ebé todan hasoru autor kriminozu sira ne'ebé habadak ona veteranu sira-nia vida.
"Ami mós husu ba Parlamentu Nasionál no Governu atu projeta lei espesífiku ida hodi valoriza no fó protesaun propriu ba as’uain FALINTIL sira iha sosiedade nia leet, se laiha forma protesaun hanesan ne’e mak ami fiar katak violénsia hasoru veteranu sei akontese tan iha futuru”, afirma nia. (*)
