"Ita prosesu hotu ona taun dadus informasaun ho intervenentes sira ba prosesu ne'e ita rona husi sira hotu ona, taun prosesu ne'e iha PSIK finaliza ona e remete hikas filafali ba Ministériu Públiku ona", dehan nia iha sala reuniaun PSIK, Kaikoli, sesta (15/10).
Tanba kazu refere iha fulan-Agostu PSIK termina ona, maibé Ministériu Públiku rasik delega filafali, nune'e iha fulan-agostu nia laran família husi matebian nian nomós suspeitu ba asindente refere PSIK prosesu hotu ona hodi submete hikas ba MP.
Ba suspeitu dadauk ne'e iha hela Timor-Leste tanba iha finfulan- agostu ne'e PSIK notifika hela hodi presta informasaun iha PSIK.
Enkuantu akontesementu asidente ne'e iha loron kuarta (23/06), husi sidadaun mane ho naran, Renato Vieira de Araújo (45), iha estrada ibun área Kuluhun, tanba soke husi motorista ida ho nia karreta privádu.
Antes ne'e mós fen husi Renato Vieira de Araújo, ho oan kiak na'in-7, husu ba Ministériu Públiku ho autoridade relevante sira atu tau atensaun ba kazu asidente Kuluhun.
"Fulan tolu ona dezde akontesimentu asidente ne'ebé ha'u lakon ha'u:nia laen nia vida, to'o oras ne'e ami seidauk hetan justisa", dehan fen kaben husi matebian, Fernanda Miguel Henrique Simões, iha rezidénsia, Kuluhun. (*)
