Portavoz Traballadór, Ersio Camilio Fernandes Xavier hatete, sira-nia parte halo greve, tanba kompaña hapara traballadór nia kontaratu la fó indiminizasaun.
“Iha sentidu solidariedade ho ami mak sira mai ho ami atu azije, tanba termina sira-nia kontratu sei hanesan mós ami-nia kontratu, entaun tenke ezije mak ami-nia direitu tomak ba indiminizasaun, tanba ami fó enerjia tomak ba servisu, nune’e saláriu indiminizasaun ne’e tenke, tanba bazea ba artigu 55”, dehan nia iha Tibar, kuarta (13/10).
Tanba ne’e, ezije mós saláriu ba lisensia anuál, tanba konsidera kompaña ko’a traballadór sira-nia saláriu la tuir servisu ne’ebé sira halo.
“Ami mós iha direitu ba sertifikadu no husu mós ami-nia saláriu ba lisensia anuál, tanba agora saláriu ne’ebé sai polemíka boot mak, kontratu ne’ebé ami asina balun 500 mai kraik, tanba bainhira ami servisu over time liu 500 sira ko’a ami-nia saláriu, ne’e hanoin lalós”, esplika nia.
Hakarak husu mós ba kompañia atu esplika subsídiu ne’ebé durante hala’o serbisu iha situasaun pandemia covid-19, tanba iha kompaña barak aplika ona subsídiu Covid-19 nian ba traballadór.
“Ami atu hein to’o bainhira mak atubele rona lolós, tanba ne’e mak ami husu atu kompaña haree tok ami-nia prosesu subsídiu ne’e”, dehan nia.
Traballadór la satisfas ho kompaña ne’ebé hapara sira-nia kontratu, tanba laiha notifika antes loron 15 tuir lei.
“Iha dia 8 ami na’in-10 mak hapara kontratu laiha notifikasaun antes 15 dias, hanesan ha’u rasik notifika ha’u iha dia 5, hapara ha’u iha dia 8 ne’e bazeia ba lei mós regula iha ne’eba”, afirma nia.
Iha mós traballadór ne’ebé servisu ba kompaña refere hamutuk 1.500, balun termina ona kontratu, maibé sira nunka ezije ba kompaña atubele selu idiminizasaun.
“Entaun husi inisiativa husi ami na’in hirak ne’e atu bolu no hafanu traballadór sira seluk katak, dalaruma ita servisu iha ne’e tempu kleur tenke ezije ba kompaña, la’ós de’it ba kompaña, maibé ezije mós ba Governu no Estadu atu pelumenus lei númeru 4/2012 favorável ba traballadór sira”, haktenik nia.
Ba kestaun ne’e www.tempotimor.com tenta komfirma ho responsável ba kompaña Chaina Harbour, maibé lakohi fó komentáriu. (*)