Print this page

PNTL Kaptura Suspeitu Na'in-4 Loke Bola Guling Ilegál 

By October 12, 2021 594
Ofisiál PNTL ida hamrik haree hel Suspeitu na’in-3 ne’ebé Komandu PNTL Munisípiu Dili kaptura, oras ne’e iha hela sela detensaun Kaikoli, tersa (12/10). Ofisiál PNTL ida hamrik haree hel Suspeitu na’in-3 ne’ebé Komandu PNTL Munisípiu Dili kaptura, oras ne’e iha hela sela detensaun Kaikoli, tersa (12/10). Foto Suplay

Tempotimor (Dili)-Polísia Nasionál Timor-Leste (PNTL), liuhusi komandu Munisípiu Dili, segunda (11/10), maizumenus tuku 22:00 liu, kaptura suspeitu hamutuk na'in-4 iha área BTN 3 (Tasitolu), Aldeia Terra Santa, Suku Madohi, Postu Administrativu Dom Aleixo, Munisipiu Dili, tanba loke atividade jogu bola guling ilegál.

Prosesu kapturasaun ne'e akontese, liuhusi atividade operasaun ne'ebé hala’o husi ekipa Servisu Investigasaun Kriminal (SIK), komandu Munisípiu Dili nian, iha área Tasitolu.

"Depois de sira tama iha ne'ebá, sira konfirma katak jogu ne'ebé mak hala'o iha ne'ebá ne'e laiha lisensa e investigasaun foti kedas medida hodi kaptura suspeitu sira lori mai iha prosesu. Agora dadauk, suspeitu na'in-4 iha hela ita-nia sela detensaun hodi kompleta 72 oras e kompleta sira-nia prosesu, hodi aprezenta ba iha ministériu públiku", dehan Komandante PNTL Munisípiu Dili, Superintendente Xefe Henrique da Costa, iha Kaikoli, tersa (12/10).

Evidénsia sira ne'ebé PNTL prende durante operasaun ne'e, osan nomós meza bola guling ne'ebé mak agora dadaun asegura hela iha Komandu PNTL.

“Depois ita halo kapturasaun, suspeitu sira tenta atu subornu, fó osan ba polísia, hamutuk dollar U$100. Entaun, ita-nia polísia kaptura kedas, sira selu tan, e lori mai hatama iha sela e agora prosesu kontinuasaun investigasaun sei prepara hela", dehan nia.

Suspeitu na'in-4 ne'e,  ho inisiál JBP, MS, FMD, RDC, no oras ne'e dadauk detein iha hela sela polísia komandu Kaikoli. (*)

Rate this item
(0 votes)
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

Related items