“Mais se alterasaun lei ne'e, ida ne'e señor deputadu sira hasai tiha. Siknifika katak mesmu ema komete krimé ho pena de prizaun 8 anos, no ema ne'ebé komete krimé ida korrupsaun ka brankamentu kapaitál, e trafiku umana, no trafiku da droga, sira ne'e mós sei bele hetan indultu”, dehan Deputada CNRT, Carmelita Caetano Moniz, iha PN, kinta (30/09).

Tanba ne’e, bankada CNRT la konkorda ho alterasaun ba artigu hamutuk haat husi Lei númeru 5/2016, kona-ba estabelese Prosedimentu Konsesaun Indultu no Komutasaun Pena ba prizioneriu sira.

Maske haree husi prespetiva legál, CNRT nota ladun iha problema, maibé haree ba prespetiva justisa nian, ida ne'e tenke haree didi’ak. Tanba iha lei ejistente ne'ebé mak aprovadu tinan hirak liubá, CNRT kaer ukun hatete ema ne'ebé mak labele hetan indultu, liliu komete korrupsaun, nomós ema ne'ebé hetan pena prizaun tinan 8 ba leten, inklui komete krime brankamentu kapitál.

Tan ne'e, Intermu justisa ne'e tenke haree, nia enkestaun ne'e saida, tanba krimé korrupsaun ne'e la'ós halakon ema ida, maibé ne'e halakon intrese públiku no interese Estadu.

"Ne'e mak ita tenke tetu didi’ak, serake ema sira ne'e ita bele ófo indultu. E depois ita mós iha lei de brankamentu kapitál rasik, ita mós aprova tiha ona lei anti korrupsaun ne'ebé ho nia kritériu todan teb-tebes, agora ita tenke haree armonizasaun ba lei hirak ne'e”, esplika nia.

Iha kestaun seluk kona-ba poder Prezidente Repúblika nian, ne'ebé mak CNRT haree katak ida ne'e poder puramente no poder judisiária, so orgaun judisiária ho juis sira mak bele halo, mesmu konstituisaun repúblika fó konpeténsia ne'e ba prezidente repúblika.

Tanba lei ne'e labele fó livre totalmente ba Prezidente Repóblika atu toma desizaun hakat liu podér judisiál nian, ida ne'e labele, tanba ne'e tenke haree hotu ho didi'ak.

"Maibe señor deputadu proponente sira mós sei nakloke tebes atu halo diskusaun ida tasak didi’ak, hodi haree filafali ba alterasaun lei ida ne'e”, afirma nia.

Dadauk Parlamentu Nasionál hamosu hela Projetu Lei númeru 33/V(3ª) kona-ba Alterasaun dahuluk ba Lei númeru 5/2016, loron 25 fulan-maiu ne’ebé estabelese Prosedimentu Konsesaun Indultu no Komutasaun Pena.

Nune'e, Artigu sira ne'ebé mak sei hetan alterasaun hanesan artigu 4, 5, 8, no artigu 9. (*)