“Ita tenke hanoin ida-ne’e, liliu maun boot sira tenke hanoin mós família sira-ne’ebé nia feen no oan, ema oho no sunu. Loloos ne’e ita hotu tuur hamutuk halo reflesaun, sera que ema sira-ne’e mate balada fuik laiha na’in. Boot sira tuur imajina labele dehan katak ukun rasik-an ona ne’e loos hotu ona, ita di’ak malu ho Indonézia ona ne’e”, deklara Mandati iha Parlamentu Nasional (PN), segunda (06/09).
Maske Timor-Leste ukun-an ona, maibé presiza buka tuir restu mortais sira-ne’e, hahú husi Saudozu Nicolau Lobato, tinan rua ona ejize Indonézia, atubele hatudu ona mai família sira.
Tanba, durante ne'e Timor-Leste ho Indonézia ba mai hela, maske rekonsilasaun ne'e atu perdua malu, maibé labele haluha fitar sira iha pasadu tanba to’o oras ne’e família vítima sira moris hela ho tristeza.
"Apartir Nicolau Lobato, ema iha Covalima-Suai, kaer hamutuk sunu hanesan animál, ida-ne’e labele ka. Ita tenke hanoin malu oituan, labele hanoin de’it ita-nia an", dehan nia.
Husu lider sira tenke tur hamutuk para ko'alia tanba ema sira-ne’ebé mak mate ne’e, nia família la’ós sosa ho osan, tanba parte Indonézia mós mai vizita sira-nia jardin eroi hanesan (Taman makam Pahlawan Seroja no Baukau) maibé konfuzun tanbasá Indonézia seidauk hatudu timoroan sira-ne’ebé mate rate laiha. (*)