Prezidente Komisaun B, deputadu José Agustinho Sequeira "Somotxo" hatete, dekretu lei númeru 6/2003, artigu 85 ne’ebé Governu fó sai ne'e la’ós foin halo, maibé lei ne'e halo kedas ona iha tinan 2003.
Tanba ne'e protestu ne’ebé halo husi Sosiedade Sivíl konserteza lei ne'e hadi’a tanba bazeia ba realidade aktual.
"Konserteja katak tenke hadi’a lei ne'e, atu tuir realidade, tanba ne'e la’ós buat foun ida. Só ita mak seidauk hatene maibé dekretu lei ne'e hasai iha 2013. se iha protestu ne'e, tuir realidade ne'e tenke halo revizaun alterasaun ba lei”, dehan nia iha Parlamentu Nasionál, kuarta (18/08).
Tanba, iha rai hothotu iha norma, no bainhira laiha norma ne'e hatudu katak anarkia forma ida ne’ebé hasai realidade inan aman tenke tula labarik ho motorizada, karik lei ne'e bandu entaun labarik sira atu tula ho saida mak ba eskola, realidade ida ne'e presiza tau iha kestaun.
Haree ba tempu agora, se hakarak implementa, Governu tenke buka kompaña ida fasilita tula labarik sira ba eskola, nune'e sidadaun sira labele tula labarik sira ho motorizada.
"Tenke iha karreta propriu tau fatin hodi labarik sira hein iha fatin ne'e hodi tula lori ba eskola ne'e bele, mais situasaun mantein nafatin hanesan ne'e, obrigatoriumente família sira hodi nia oan ho motorizada no kondisaun ne’ebé mak iha lori ba eskola, sira ne’ebé mak karreta iha ho karreta no sira ne’ebé karreta laiha mantein Motorizada”, afirma nia.(*)