“Sim tuir prosesu normál ami sei halo identifikasaun ba nia, orsida depende husi progresu identifikasaun ida ne'e, durante prosesu identifikasaun mak forte orsida ita halo kedas detensaun ba nia durante oras 72 tuir prosesu depois mak submete iha Tribunál hodi ba iha primeira interogatóriu”, dehan Euclides iha edifísiu KAK, Farol, segunda (16/08).
Komisaun Anti Korrupsaun (KAK) ezekuta orden juiz, Ivan Patrocino Antonio iha Tribunál Distritál Dili (TDD) ho númeru NUC 007/21.CAC.TL halo mandadu buska no apreensaun ba sasán no dokumentu iha Autoridade Portuária Timor-Leste (APORTIL), bazeia ba númeru NUC 007/21.CAC TL Diresaun Kabotajen Nasionál no hala’o mós buska no prensaun ba dokumentu balun iha rezidénsia arguidu ho inisiál F da CC nian relasiona ho prosesu aluga ró Tranship II.
Tanba ne’e krime lubuk ida ne’ebé investigadór sira prende hanesan komputadór, dokumentu importante sira relasiona ho prosesu kontratu aluga Ró Tranship II ho ninian prosesu aprovizionamentu no pagamentu.
“Dokumentu esensiál balun ne'ebé mak iha mak hanesan kontratu sira kona-ba aprovizionamentu oinsá mak Ró Traship II ne'e mai kontaktu sira nomós ita mós asegura hela komunikasaun sira liliu telefone no mós ita-nia ekipamentu servisu ne'ebé mak Diretór Nasionál Kabotajen ne'e uza”, informa nia.
Presidente Konsellu Administrasaun Autoridade Portuáriu Timor Leste (APORTIL), Flávio Cardoso Neves hatete, prontu koopera ho ekipa hothotu hodi nune'e ekipa investigadór sira bele hetan dadus sira hotu.
“"Ita hotu hatete katak kontratu ne'e Ministru mak aprova diretamente APORTIL hanesan fasilita hanesan orsamentu ne'ebé ezektuta iha APORTIL, depois kona-ba prosesu atu pagamentu ha'u hanoin envolve ministru mak aprova ha'u hanoin oras ne'e pagmentu seidauk la'o tantu ida ne'e ha'u hanoin finansas dokumentu sira mós orsida fó hotu dala ida depois, ha'u hanoin prontu fasilita orgaun sira ne'ebé ha'u-nia servisu tantu dokumentu ne'ebé iha ha'u sei fasilita hotu depois ha'u fiar katak saida mak imi husu imi sei hetan”, dehan nia.
Iha operasaun ne’e, investigadór KAK halo buska apreensaun iha fain tolu (3), Gabinete Diretór Kabotajen, Gabinete Prezidente APORTIL no Rezidénsia Diretór Nasionál Kabotajen nian.
Ekipa Investigadór KAK halo auto inkeritu ba Diretór Nasionál Diresaun Kabotajen iha APORTIL nian edifísiu iha tasi ibun Portu Dili tanba suspeita hela kona-ba autória krime abuzu poder no partisipasaun ekonomia prevé iha artigu 297 juntu 299 Kódigu Penál.
Informasaun addisionél ne’ebé ekipa inspeksaun prevensaun KAK nian hetan iha terenu momentu ne’ebá revela Ró Tranship II Gresik ninian produsaun tinan 2007 no Ró Sukses ne’ebé halao tiha ona ninian operasaun iha Timor tinan hirak nian laran fabrikadu iha tinan 2017.
Ró ne’e rasik oli suli hela iha ne’ebé perigu tebes ba ró no pasajeiru sira-nian salvasaun vida. Lampu sira mós kesi ho tali rafia no AC ró nian aat hodi uza fali AC ne’ebé atu instala de’it ba uma nian.
Nune’e iha artigu 5 Lei Kriasaun KAK, define katak Komisaun iha kompeténsia atu halibur (rekolla) no análiza informasaun hirak ne'ebé relasionadu ho kauza sira ba korrupsaun no fó-hanoin (akonsella) ba kualker instituisaun ka entidade públika sira kona-ba oinsá prevene no luta hasoru hahalok korrupsaun.
Iha artigu 9 Dekretu Lei Nú. 23/2015 kona-ba Estrutura Orgánika KAK, define katak Unidade Inspesaun no Monitorizasaun (UIM) responsável ba apoiu partisipasaun no sensibilizasaun sosiál no emprezariál nomós monitorizasaun situasaun indikadu korrupsaun iha administrasaun direita no indireta Estadu. (*)
