Reprezentante GAFTL atuál Diretora Plan Internasional iha Timor-Leste (PITL), Dillyana Ximenes hatete, audensia ne'ebé GAFTL hala'o ho Prezidente PN, atu husu meza PN nia ideia no prioridade ba lei ida ne'e oinsa mak bele fó protesaun ba labarik sira iha rai laran.

“Ami mai husu sua eselensia nia hanoin nomós prioridade ba lei ida ne'e hodi bele hetan aprovasaun, lei protesaun labarik”, dehan nia hafoin hasoru malu ho Prezidente PN, Aniceto Guteres iha Parlamentu Nasionál, kinta (05/08).

Tanba lei protesaun labarik nian, hanesan públiku tomak haree, Komisaun F halo ona audiénsia públiku hodi ko’alia ho organizasaun entidade tomak iha asuntu labarik nian, atubele fó hanoin ruma oinsá mak haree lei ne'e proteze labarik sira, iha tempu babain nomós iha situasaun perigu nia laran.

Maibé, projetu lei ne'e plan internasional mós hato'o ona pontu espesífika hamutuk 18 ba Parlamentu Nasionál liuhusi Komisaun F ne’ebé trata asuntu saúde, seguransa sosiál no igualdade jéneru, atu konsidera iha prosesu diskusaun lei protesaun labarik no joven iha perigu.

Hatan ba kestaun ne'e Prezidente PN, Aniceto Longuinhos Guteres Lopez hatete, nia parte sei nafatin iha kompromisu atu akompaña liliu fó prioridade ba diskusaun no aprovasaun projetu lei protezaun labarik nian.

“Sim iha komitmentu para hodi akompaña nomós fó prioridade ba lei protesaun labarik nian”, dehan nia.

Grupu Aliansa Feto Timor-Leste ne'e, ejiste iha munisípiu Dili, Aileu no Ainaro, konpostu husi labarik feto no mane, ne'ebé hetan enpoderamentu másimu husi plan internasional no parseiru inklui entidade governu balun. (*)